Birgalikda soʻzlashni, tinglashni va bir-birimizni eshitishni oʻrganamiz
Milliy gvardiya Navoiy viloyati boʻyicha boshqarmasi harbiy xizmatchilari va Jamoat xavfsizligi universiteti kursantlari tomonidan Karmana tumanidagi Oilaviy bolalar uylari farzandlari uchun qiziqarli mashgʻulotlar oʻtkazildi.
Darslar oʻyin tarzda tashkil etilib, vazifalar oʻzidagi "men"ni, istaklarini va ijodiy, ilmiy sohalarga, amaliy sanʼat hamda sportga boʻlgan qiziqishlarini bildirishdan iborat edi.
Bundan tashqari, yoshlar bir-birlarini tinglashni, oʻz fikrlarini himoya qilishni va shu bilan birga, qarama-qarshi fikrni hurmat qilishni oʻrganishdi. Oʻgʻil-qizlar darslardan juda zavqlanishdi: ular yengillikni his qilib, oʻzaro bahslashishdi va bir-birlarini diqqat bilan tinglab, murosaga kelish sirlarini oʻzlashtirdi.
Bolalarning mashgʻulotdan oʻrgangan muloqot qilish qobiliyatlari, albatta, boshqalar bilan ijobiy munosabatlarni oʻrnatishda ular uchun foydali boʻlishiga ishonamiz.
