“Bizga maktab kerak yoxud zamon Avloniysi" spektaklida Oilaviy bolalar uyi farzandlari ham ishtirok etdi
Zamon Avloniysi deya ta’rif berilgan O’zbekiston Xalq o’qituvchisi, «Buyuk xizmatlari uchun» va «Mehnat shuhrati» ordenlari sohibi, «Qorako’l maktabi» asoschisi To’xtamurod Jumayevning hayotiga bag’ishlangan mazkur spektaklga Oilaviy bolalar uyi farzandlari, Milliy gvardiya harbiy xizmatchilari hamda ularning oila a`zolari tashrif buyurdi.
Davomiy olqishlar bilan qarshi olingan mazkur sahna asarida millat kelajagi bilan bog’liq dolzarb mavzuga qo’l urilgan bo’lib, qahramonning ilm yo’lida bosib o’tgan mashshaqatli yo’li aks etgan. To’xtamurod Jumayev o’z orzusidagi maktabni yaratish uchun qanday qiyinchiliklarni boshidan kechirgani, maktabning bugungi kunga kelib erishgan yutuqlari tomoshabinlarning olqishlariga sabab bo’ldi.
Qo’chqor Norqobil asari, Oydin Abdullayeva musiqasi asosida rejissyor Dilmurod Xaqberdiyev, tomonidan yaratilgan mazkur sahna asari To’xtamurod Jumaevning xotirasiga bag’ishlangan bo’lib, real voqealar asosida sahnalashtirilgan.
Tadbir so’ngida, teatr jamoasiga ta’limning mashaqqatli yo’liga bag’ishlab yaratilgan, ayni paytda o’ta dolzarb sahna asari uchun minnatdorlik bildirildi.
