Bolalar bilan Konstitutsiya haqida suhbatlashildi
O‘zbekiston Respublikasi Konstitutsiyasi qabul qilinganligining 31 yilligini nishonlash arafasida Milliy gvardiya Andijon viloyati bo‘yicha boshqarmasi harbiy xizmatchi va xodimlari oilaviy bolalar uylarida mehmonda bo‘lishdi. Bolalarga Asosiy qonunimiz bo‘lgan Konstitutsiya va undagi asosiy qonun-qoidalar, tushunchalar haqida oddiy va oson tilda gapirib berishdi, jumladan nima uchun Konstitutsiyaning asosiy qoidalarini bilish zarurligi, inson huquq va erkinliklari, va umuman “Erkinlik”, “Qonuniy manfaat” tushunchalarining nimani anglatishi haqida gapirib berishdi. Shuningdek, bolalar Konstitutsiyaning yaralish tarixi, qachon va qayerda qabul qilinganligi hamda qanday qilib Asosiy qonunga o‘zgartirishlar kiritilganligi haqida bilib olishdi. Milliy gvardiya vakillarini bolalarning o‘zlari ham Konstitutsiya haqida bir qancha tushunchalarga ega ekanliklari quvontirdi. Xayrlashish oldidan gvardiyachilar bolalarga O‘zbekiston Respublikasi Konstitutsiyasining yangi nashri hamda maxsus tayyorlangan plakat va broshyuralar sovg‘a qilishdi.
