Bolalarga taʼlim olishda ko‘maklashish – kelajakka sarmoya kiritish demakdir
Milliy gvardiya Farg‘ona viloyati bo‘yicha boshqarmasi harbiy xizmatchi va xodimlari oilaviy bolalar uylarida istiqomat qiluvchi bolalarni har tomonlama qo‘llab-quvvatlashmoqda. Ular bilan mustaqil hayotga qadam qo‘yishda ko‘maklashuvchi suhbatlar olib borib, chet tillarini o‘rganishda ko‘maklashmoqda, turli tayyorlov kurslari va to‘garaklarga qatnashishlariga yordamlashishmoqda. O‘smirlar orasida eng talabgir mashg‘ulot bu kompyuter kurslaridir. Milliy gvardiya vakillari esa ularning bu qiziqishlarini qo‘llab-quvvatlamoqda, zero IT sohasi bugungi kunda yurtimizda jadal rivojlanayotgan mutaxassisliklardan biri bo‘lib, ushbu soha vakillariga nisbatan mehnat bozorining har qaysi yo‘nalishida, deylik iqtisodiyot, sog‘liqni saqlash, taʼlim sohalarida, istalgan korxona tashkilotlarda talab katta. Shu sababli Milliy gvardiya xodimlari Farg‘ona shahrida yashovchi Xurshida va uchko‘priklik Sobir uchun kompyuter to‘plamini sotib olishga homiy topdi. Aytish kerakki, bolalar kelajak kasbiga yo‘l ochuvchi ajoyib sovg‘a uchun minnatdorchilik bildirdi.
