IJTIMOIY HIMOYAGA MUHTOJ BOLALAR TAʼLIM-TARBIYASI BO‘YICHA YANGI TIZIM JORIY ETILADI
Yurtboshimiz raisligida 28 iyul kuni nogironligi bo‘lgan, ota-ona qaramog‘idan mahrum va yetim bolalarni davlat tomonidan qo‘llab-quvvatlashni kengaytirish bo‘yicha o‘tkazilgan videoselektorda aniq vazifalar va maqsadli yo‘nalishlar belgilab berildi.
Mazkur yig‘ilishda davlatimiz rahbari Mehribonlik uylaridagi bolalarni oilaga yaqin muhitda tarbiyalash, bilim va maʼnaviyatli, vatanparvar insonlar etib voyaga yetkazish zarurligini taʼkidladi.
Shu maqsadda bu borada yangi tizim joriy qilinishi belgilandi. Unga ko‘ra, 16 ta Mehribonlik uyi va 4 ta Bolalar shaharchalaridagi yoshlarning taʼlim-tarbiyasiga O‘zbekiston Respublikasi Milliy gvardiyasi masʼul etib belgilandi.
Bugungi kunda Milliy gvardiya tizimining barcha bo‘g‘indagi rahbarlari yurtboshimiz tomonidan bildirilgan ishonchni his qilgan holda, masʼuliyatli va sharafli vazifani bajarishga kirishdilar.
Ushbu yo‘nalishdagi ishlarni tizimli yo‘lga qo‘yish hamda yangi bosqichga olib chiqish maqsadida Milliy gvardiya qo‘mondoni general-mayor R.Djurayev joriy yilning 30 iyul kuni Oliy Majlisning Inson huquqlari bo‘yicha (ombudsman) o‘rinbosari - Bola huquqlari bo‘yicha vakili, Toshkent shahar hokimligi, Xalq taʼlimi vazirligi va Bosh prokuratura mutasaddi rahbarlari, shuningdek hududiy va shahar vasiylik organi mutaxassislari bilan uchrashib bir qator masalalar muhokama qilindi.
31 iyul kuni esa Milliy gvardiya qo‘mondoni poytaxtimizda Oilaviy bolalar uyi tashkil qilish istagida bo‘lgan uch nafar fuqaro K.Atayeva, F.Uteshova va U.Turdaliyevalarni ushbu yo‘nalishga masʼul mutasaddi rahbarlar hamda mutaxassis xodimlar ishtirokida qabul qildi.
Uchrashuv ochiq muloqot tarzida bo‘lib o‘tdi. Oilaviy bolalar uyi tashkil qilish istagida bo‘lgan ushbu fuqarolarning takliflari va rejalari shuningdek, mutaxassislar tomonidan bildirilgan huquqiy-meʼyoriy hujjatlar talablari doirasidagi fikrlari tinglandi.
Milliy gvardiya qo‘mondoni ushbu fuqarolarga xayrli ishga qo‘l urayotganliklari uchun o‘z minnatdorchiligini bildirdi. Ularga Oilaviy bolalar uyi tashkil qilishlari uchun qisqa muddatlarda barcha zarur shart-sharoitlar yaratib berilishini ishonch bilan taʼkidlab, tegishliligi bo‘yicha masʼul xodimlarga topshiriqlar berdi.
