Baxtli bo‘ling, Salimaxon va Jamshidbek!
Joriy yilning 27 iyul kuni poytaxtimizda yana bir yosh oila, Salima Amanova va Jamshidbek Qoraxonovlarning qonuniy nikohiga va ularning cheksiz xursandchiligi guvohi bo‘ldik. Tantanali marosimga yoshlarni tabriklash uchun Salimaning Mehribonlik uyidagi do‘stlari va Milliy gvardiya vakillari tashrif buyurishdi.
Gap shundaki, ota-onasining fojiali vafotidan so‘ng “Mehribonlik” uyiga tushib qolgan qizaloqning taqdiri 2021-yilning avgust oyidan boshlab o‘zgardi, Davlatimiz rahbarining “Yetim bolalar va ota-ona qaramog‘idan mahrum bo‘lgan bolalarni tarbiyalashning tubdan yangilangan tizimini joriy etish chora-tadbirlari to‘g‘risida”gi qaroriga asosan Milliy gvardiya xodimlari respublika bo‘ylab ota mehriga muhtoj tarbiyalanuvchilarning qo‘lidan ushlagani kabi Salimaxonning ham o‘ksik qalbidan joy topib uni oila deb atalmish muqaddas ostonaga qadam qo‘yishiga ko‘maklashishdi.
Xususan, Toshkent shahridagi 21 mehribonlik uyida tarbiyachi bo‘lib yillar davomida ishlab kelgan Umida Turdialiyeva, 2021-yilda Milliy gvardiya ko‘magida Salima va yana to‘rt nafar farzandni, o‘z oilasiga qabul qildi. Shundan beri uch yil o‘tdi, Salima oila muhitida mehr va g‘amxo‘rlikda o‘sdi. Mana endi u ham o‘z oilasini yaratib mustaqil hayotga qadam qo‘ydi.
Yoshlar do‘stlar davrasida uchrashishdi. Birinchi kunlardanoq ular o‘rtasida do‘stlik paydo bo‘ldi va har bir uchrashuvda ular qanchalik o‘xshash qarashlar va hatto orzulari borligidan quvonishdi.
Misol uchun, ikkalasi ham oilada er va xotin ishlashi kerak, jamiyatda o‘z o‘rnini topishi kerak deb hisoblaydi. Yigit Toshkent davlat transport universitetining 4-kurs talabasi, yozgi taʼtilda esa mashhur qandolatchilik sexida yarim ish kunida ishlaydi.
Hozir Jamshidbek rafiqasi bilan kirish imtihonlari natijasini intiqlik bilan kutmoqda: qiz onasi Umida Komilovna singari o‘qituvchilik kasbini tanlab, Davlat pedagogika universitetiga kirish imtihonlarini topshirdi.
Yosh oilaga baxt va farovonlik, mehr va muhabbat tilaymiz.
