Бахтли бўлинг, Салимахон ва Жамшидбек!
Жорий йилнинг 27 июль куни пойтахтимизда яна бир ёш оила, Салима Аманова ва Жамшидбек Қорахоновларнинг қонуний никоҳига ва уларнинг чексиз хурсандчилиги гувоҳи бўлдик. Тантанали маросимга ёшларни табриклаш учун Салиманинг Меҳрибонлик уйидаги дўстлари ва Миллий гвардия вакиллари ташриф буюришди.
Гап шундаки, ота-онасининг фожиали вафотидан сўнг “Меҳрибонлик” уйига тушиб қолган қизалоқнинг тақдири 2021-йилнинг август ойидан бошлаб ўзгарди, Давлатимиз раҳбарининг “Етим болалар ва ота-она қарамоғидан маҳрум бўлган болаларни тарбиялашнинг тубдан янгиланган тизимини жорий этиш чора-тадбирлари тўғрисида”ги қарорига асосан Миллий гвардия ходимлари республика бўйлаб ота меҳрига муҳтож тарбияланувчиларнинг қўлидан ушлагани каби Салимахоннинг ҳам ўксик қалбидан жой топиб уни оила деб аталмиш муқаддас остонага қадам қўйишига кўмаклашишди.
Хусусан, Тошкент шаҳридаги 21 меҳрибонлик уйида тарбиячи бўлиб йиллар давомида ишлаб келган Умида Турдиалиева, 2021-йилда Миллий гвардия кўмагида Салима ва яна тўрт нафар фарзандни, ўз оиласига қабул қилди. Шундан бери уч йил ўтди, Салима оила муҳитида меҳр ва ғамхўрликда ўсди. Мана энди у ҳам ўз оиласини яратиб мустақил ҳаётга қадам қўйди.
Ёшлар дўстлар даврасида учрашишди. Биринчи кунларданоқ улар ўртасида дўстлик пайдо бўлди ва ҳар бир учрашувда улар қанчалик ўхшаш қарашлар ва ҳатто орзулари борлигидан қувонишди.
Мисол учун, иккаласи ҳам оилада эр ва хотин ишлаши керак, жамиятда ўз ўрнини топиши керак деб ҳисоблайди. Йигит Тошкент давлат транспорт университетининг 4-курс талабаси, ёзги таътилда эса машҳур қандолатчилик цехида ярим иш кунида ишлайди.
Ҳозир Жамшидбек рафиқаси билан кириш имтиҳонлари натижасини интиқлик билан кутмоқда: қиз онаси Умида Комиловна сингари ўқитувчилик касбини танлаб, Давлат педагогика университетига кириш имтиҳонларини топширди.
Ёш оилага бахт ва фаровонлик, меҳр ва муҳаббат тилаймиз.
