“Mehribonlik" uyining sobiq tarbiyalanuvchisi uni har tomonlama qo‘llab-quvvatlagani uchun minnatdorlik bildirdi
Namoz Yodgorov bolalik chog‘larini Buxoro viloyatida joylashgan 32-sonli Mehribonlik uyida o‘tkazgan. Ushbu maskanda u yaxshi taʼlim-tarbiya olgan va doimo davlat tomonidan qaratilayotgan eʼtiborni his qilib yashagan. Bugungi kunda bo‘lsa, u el koriga yaraydigan inson bo‘lish, mamlakat rivojiga hissa qo‘shish uchun harakat qilmoqda.
Namozning orzusi harbiy bo‘lish edi. Shu sababli u Buxoro Yuridik va maishiy xizmat kollejini tamomlagach, Milliy gvardiya saflarida muddatli harbiy xizmatni o‘tash uchun Toshkent shahriga otlandi. Tabiiyki, aqlli, ko‘zlagan maqsadlari yo‘lida sobitqadam yigit qo‘llab-quvvatlandi. Muddatli harbiy xizmatdan qaytgach esa Namoz “Qo‘riqlash” boshqarmasiga uni ishga qabul qilishlarini so‘rab murojaat qildi. Shunday qilib, hozirgi kunda Namoz “Qo‘riqlash” boshqarmasi saflarida xizmat olib bormoqda. Qadrdoniga aylanishga ulgurgan Milliy gvardiya esa yigit oila qurishga qaror qilgan payti to‘y marosimini o‘tkazishga ham beg‘araz ko‘maklashdi.
Kuni kecha yosh oilaga yana bir ko‘mak ko‘rsatildi: Namozjon, “Mehribonlik” uyining sobiq tarbiyalanuvchisi sifatida xonadonga ega bo‘ldi.
Yangi xonadonda barcha zarur jihozlar mavjud, yumshoq mebel, maishiy texnika, ro‘zg‘or uchun idish-tovoq, muhtasar aytganda, Milliy gvardiyaga huddi o‘g‘il farzanddek bo‘lib qolgan Namozjonga otalarcha g‘amxo‘rlik ko‘rsatildi.
