Yosh oilaga baxt va totuvlik tilab qolamiz!
Inson hayotida shunday kunlar borki, bu kunlar uning tarix zarvaraqlaridan yuksak o‘rin egallaydi. Xuddi shunday insonlardan biri 26 yoshli Ozodbek Raimovning ham hayotida baxtli kunlar ro‘y berdi. Sobiq Marg‘ilon Mehribonlik uyi tarbiyalanuvchisi Ozodbek Milliy gvardiya Farg‘ona viloyati bo‘yicha boshqarmasi vakillari bilan oila qurib, yangi hayot qurish rejasi haqida bo‘lishganda, gvardiyachilar yosh yigitga to‘y tadbirini tashkillashtirishda yordam berishlarini aytishdi.
Davlat taʼlim-tarbiya muassasasida, ota-ona mehrisiz ulg‘aygan yoshlar atrofdagilarning eʼtibori va qo‘llab quvvatlashini qadrlashadi. Gvardiyachilar bilan birinchi tanishuv kunidanoq Ozodbek harbiylarning samimiyligini his qildi. Ularning tanishuviga esa uzoq vaqt bo‘lmagan. Davlatimiz rahbari topshirig‘iga asosan hokimlik, Milliy gvardiya va bir qator qiziqish bildirgan tizim xodimlaridan tashkil topgan ishchi guruh 30 yoshgacha bo‘lgan yoshlarning hayotini o‘rganishga kirishgan. Yoshlar qanday muammolar bilan to‘qnash kelishganini aniqlab, qiyin ahvolda qolgan yoshlarning muammolarini hal etish: jumladan, doimiy ish, taʼlim, kasbi yo‘q bo‘lgan yoshlarni oyoqqa turishiga yordam berishni boshlashgan. Ozodbek Raimov esa Milliy gvardiya viloyat bo‘yicha boshqarma boshlig‘i o‘rinbosariga biriktirildi.
Hamma birdek kutgan to‘y Farg‘ona shahridagi “Mumtoz” tantanalar saroyida bo‘lib o‘tdi. Yoshlarni tabriklash, ularga baxt tilab sovg‘alar berishga ko‘plab mehmonlar va shu tariqa gvardiya vakillari ham tashrif buyurishdi.
Barchaning tilaklariga qo‘shilgan holda yoshlarga baxt, o‘zaro totuvlik tilaymiz!
