Yoshlar uchun ochiq eshiklar kuni tadbirlari oʻtkazilmoqda
Ertamiz egalari boʻlgan yosh avlodni vatanparvarlik ruhida tarbiyalash, ayniqsa harbiy-vatanparvarlik ruhini ularning qalbida yuksaltirish, maʼnaviy barkamol, aqlan yetuk, jismonan sogʻlom boʻlib voyaga yetishlarini taʼminlash borasidagi ishlar doirasida, Oʻzbekiston Respublikasi Milliy gvardiyasi Toshkent mintaqaviy oʻquv markazida yoshlar uchun ochiq eshiklar kuni tadbiri oʻtkazildi.
Tadbir davomida o‘g‘il-qizlar, markazda tinglovchilar uchun yaratilgan sharoitlar, yoshlar uchun yoʻlga qoʻyilgan sport toʻgaraklari, qurol-aslaha hamda maxsus texnikalar, xizmat otlari, moto- va avtopatrulning xizmat faoliyati, "Qoʻriqlash" xizmatining tezkor harakatlanuvchi guruh xodimlarining vazifalari bilan yaqindan tanishdilar.
Bundan tashqari, bu kabi tadbir Milliy gvardiya Namangan viloyati "Qoʻriqlash" boshqarmasida Namangan davlat Pedagogika instituti talabalari uchun ham tashkil etildi.
Ushbu tadbir yoshlar orasida vatanparvarlik hissini mustahkamlash, ularni qurolli kuchlarimizda olib borilayotgan islohotlar bilan yaqindan tanishtirish, shuningdek, harbiy xizmat sohasiga boʻlgan qiziqishlarini oshirishdan iborat. Tadbir davomida talabalarga Milliy gvardiya xodimlari uchun yaratilgan shart-sharoitlar, zamonaviy harbiy texnika va asbob-uskunalar namoyish etildi.
Tadbir doirasida talabalar Milliy gvardiya faoliyati, uning kundalik vazifalari va xodimlarning masʼuliyatli hayoti bilan yaqindan tanishdilar. Harbiy-vatanparvarlik mavzusidagi maxsus koʻrgazmalar, treninglar va interaktiv suhbatlar yoshlar oʻrtasida katta qiziqish uygʻotdi. Shuningdek, ularga harbiy xizmatga kirish tartibi, unga qoʻyilgan talablar va imkoniyatlar haqida batafsil maʼlumot berildi.
