Fargʻona viloyatida Mehribonlik uyining navbatdagi toʻrt nafar sobiq bitiruvchilariga uy-joy kalitlari topshirildi
Hasan va Xusan Oxunovlar Fargʻona shahridagi 1-sonli Mehribonlik uyida ulgʻaygan. 2020-yilda 18 yoshga toʻlgan ushbu egizaklarga yashash uchun umuman sharoiti boʻlmagan yotoqxonaning bir xonasi ajratilgan.
Joriy yil boshida Milliy gvardiya va hokimiyat vakillaridan iborat ishchi guruh tomonidan 30 yoshgacha boʻlgan Mehribonlik uyi sobiq bitiruvchilarining turmush sharoitini oʻrganish jarayonida aka-ukalar ham yashash sharoitini yaxshilashga muhtojlar roʻyxatiga kiritildi.
Hamkorlikda amalga oshirilgan ishlar samarasida kuni kecha Fargʻona shahridagi “Yulduz” mahalla fuqarolar yigʻinidan Hasan va Xusanlarga barcha sharoitga ega yangi xonadon kalitlari topshirildi. Aka-uka davlat tomonidan koʻrsatilayotgan bu kabi gʻamxoʻrlikdan mamnun.
Shuningdek, uch nafar farzandning onasi 27 yoshli Nargiza Abdurahmonova ham Qoʻqon shahridagi 12-sonli Mehribonlik uyi 21 yoshli Odarka Ermakova Fargʻona shahridagi 1-sonli Mehribonlik uyi bitiruvchilari hisoblanadi.
Ular yillar davomida ota-ona qaramogʻidan mahrum boʻlgan bolalar qatori uy-joy bilan taʼminlanishlarini kutishgan.
Nargiza 12 yil davomida yotoqxonada yashagan va bu vaqt ichida u turmushga chiqib, uch nafar farzand koʻrgan. Hammomi, hojatxonasi va oshxonasi umumiy boʻlgan, sanitariya-gigiyena talablariga javob bermaydigan yotoqxonaning bir xonasida besh kishi yashashgan.
Milliy gvardiya va hokimiyat vakillari tomonidan oʻrganilib roʻyxatga kiritilgandan soʻng, Nargizada ham umid uchqunlari paydo boʻla boshlagan boʻlsa bugun, Qoʻqon shahridagi “Mustaqillik” MFYda oʻzi va farzandlari uchun barcha sharoit yaratilgan xonadonning baxtli egasiga aylandi.
Odarka Ermakova esa 18 yoshga toʻlgandan soʻng, akasinikida (davlat tomonidan ijtimoiy himoyaga muhtojlar uchun ajratilgan xonadonda ) qoʻnim topgan. Ammo oʻz oilasi va uyi boʻlish orzu istagi bilan oʻtgan yili chet elga pul ishlab topish uchun ketadi biroq, qoʻlida hunari boʻlmagan odamga har joyda qiyinchilik tugʻdiradigan taqdir uni Vataniga qaytishga majbur qiladi.
Kuni kecha qahramonimizga ham Fargʻona shahridagi koʻp qavatli uylarning biridan yangi xonadon kaliti topshirildi. Oʻz xonadoniga qadam qoʻygan Odarkaning xursandchiligini tariflashga til ojiz.
