Mehribonlik muassasalarining yana 7 nafar sobiq tarbiyalanuvchilari uy-joy bilan taʼminlandi
Kuni kecha Toshkent shahridagi Mehribonlik muassasalarining sobiq tarbiyalanuvchilaridan yetti nafariga tantanali ravishda yangi xonadon kalitlari topshirildi.
Xususan, ular orasida bolaligi 22-sonli Mehribonlik uyida o‘tgan Nurgaliyeva Rigina va Ibragimov Ilmir, 30-sonli Mehribonlik uyida ulg‘aygan Melkubaev Muhamed va Kopilova (Balashova) Karina hamda SOS-O‘zbekiston bolalar mahallalari uyushmasidan Umida Rahmatova, Sergey Afanasev va Kim Viktoriya bor.
Hozirda ularning yoshi 23 yoshdan 26 yosh oralig‘ida. Yaʼni, ular Mehribonlik muassasalarini bitirganlaridan so‘ng besh yildan sakkiz yilgacha vaqt o‘tdi. Baʼzilari oila qurib, farzandlarini tarbiyalashgan. Yillar davomida ularning har biri mustaqil ravishda uy-joy qidirgan, chunki yigit-qizlar joylashtirilgan yotoqxonada sharoitlar sanitariya meʼyorlariga javob bermagan, hammom, hojatxona va oshxona bo‘lmagan.
Davlatimiz rahbarining yetim bolalar va ota-ona qaramog‘idan mahrum bo‘lgan bolalar muammolariga qaratayotgan eʼtibori tufayli uy-joy bilan taʼminlanish holati o‘zgardi. Prezidentimiz tomonidan 2022 yilning 13 dekabr kuni Toshkent shahridagi Uchtepa tumaniga tashrifi chog‘ida bo‘lib o‘tgan yig‘ilishda SOS-O‘zbekiston bolalar mahallalari uyushmasi, Mehribonlik uylari va Bolalar shaharchalarining 30 yoshgacha bo‘lgan sobiq tarbiyalanuvchilarining turmush sharoitini yaxshilash vazifasi belgilangan edi. Bu ishlarga Milliy gvardiya, Maktabgacha va maktab taʼlimi vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari masʼul yetib belgilandi. Masʼullar tomonidan bitiruvchilarning yashash sharoitlari o‘rganilib, muammolarini hal yetish choralari ko‘rildi.
Natijada, joriy yilning o‘zida 30 yoshgacha bo‘lgan 56 nafar sobiq tarbiyalanuvchilar uy-joy bilan taʼminlandi. Ushbu toifadagi jami 184 nafar yoshlar xonadonlarga ega bo‘lishdi.
