Меҳрибонлик муассасаларининг яна 7 нафар собиқ тарбияланувчилари уй-жой билан таъминланди
Куни кеча Тошкент шаҳридаги Меҳрибонлик муассасаларининг собиқ тарбияланувчиларидан етти нафарига тантанали равишда янги хонадон калитлари топширилди.
Хусусан, улар орасида болалиги 22-сонли Меҳрибонлик уйида ўтган Нургалиева Ригина ва Ибрагимов Илмир, 30-сонли Меҳрибонлик уйида улғайган Мелкубаэв Муҳамед ва Копилова (Балашова) Карина ҳамда SOS-Ўзбекистон болалар маҳаллалари уюшмасидан Умида Раҳматова, Сергей Афанасев ва Ким Виктория бор.
Ҳозирда уларнинг ёши 23 ёшдан 26 ёш оралиғида. Яъни, улар Меҳрибонлик муассасаларини битирганларидан сўнг беш йилдан саккиз йилгача вақт ўтди. Баъзилари оила қуриб, фарзандларини тарбиялашган. Йиллар давомида уларнинг ҳар бири мустақил равишда уй-жой қидирган, чунки йигит-қизлар жойлаштирилган ётоқхонада шароитлар санитария меъёрларига жавоб бермаган, ҳаммом, ҳожатхона ва ошхона бўлмаган.
Давлатимиз раҳбарининг етим болалар ва ота-она қарамоғидан маҳрум бўлган болалар муаммоларига қаратаётган эътибори туфайли уй-жой билан таъминланиш ҳолати ўзгарди. Президентимиз томонидан 2022 йилнинг 13 декабрь куни Тошкент шаҳридаги Учтепа туманига ташрифи чоғида бўлиб ўтган йиғилишда SOS-Ўзбекистон болалар маҳаллалари уюшмаси, Меҳрибонлик уйлари ва Болалар шаҳарчаларининг 30 ёшгача бўлган собиқ тарбияланувчиларининг турмуш шароитини яхшилаш вазифаси белгиланган эди. Бу ишларга Миллий гвардия, Мактабгача ва мактаб таълими вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари масъул етиб белгиланди. Масъуллар томонидан битирувчиларнинг яшаш шароитлари ўрганилиб, муаммоларини ҳал етиш чоралари кўрилди.
Натижада, жорий йилнинг ўзида 30 ёшгача бўлган 56 нафар собиқ тарбияланувчилар уй-жой билан таъминланди. Ушбу тоифадаги жами 184 нафар ёшлар хонадонларга эга бўлишди.
