Gvardiyachilar bilan uchrashuv bolalar uchun quvonchli o‘tdi. Bolalar harbiy xizmat bilan birga ot sporti hamda tog‘ga chiqish to‘g‘risida qiziqarli maʼlumotlarga ham ega bo‘lishdi
Xiva shahridagi 18-sonli maktabda tahsil olayotgan oilaviy bolalar uylari farzandlari uchun Milliy gvardiya Xorazm viloyati bo‘yicha boshqarmasi harbiy xizmatchilari tomonidan qiziqarli tadbir uyushtirildi. Tadbirdan asosiy maqsad o‘sib kelayotgan yosh avlodning sportga va eng muhimi Vatan himoyachisi kasbiga qiziqishini oshirishdan iborat.
Tadbirda gvardiyachilar bolalarga jismoniy va tog‘ mashg‘ulotlarining qanday bajarilishi, qurol-yaroq va eng kerakli anjom-aslahalar haqida maʼlumot berishdi hamda tog‘ga ko‘tarilish va xafvsizlik qoidalarini birma-bir tushuntirishdi.
Shundan so‘ng o‘quvchilarga kamondan otish bo‘yicha mahorat darsi o‘tkazilib, faol ishtirok etgan bolalarga esdalik sovg‘alari berildi.
Tadbirning ikkinchi kunida esa, oilaviy bolalar uylari farzandlari Otchopar maydoniga taklif etildi. Bu yerda Milliy gvardiya Chavandozlar maktabi mutaxassislari ot sportining tarixi va mamlakatimizdagi rivoji to‘g‘risida bolalarga gapirib berishdi. Tadbiring eng diqqatga sazovor joyi esa, ot minish bo‘yicha mahorat darsi bo‘ldi. Dars davomida bolalar zavq va hayajon bilan otlarga minib ko‘rishdi.
