Yaxshilik, ezgulik hech qachon mukofotsiz qolmagan
Xalqimiz azaldan saxovati bilan shuhrat qozongan. So‘nggi yillarda kam taʼminlangan, yordamga muhtoj oilalarga, yetimlar va mehribonlik uylariga yordam ko‘rsatish anʼanasi yana ham keng ommalashdi. Odamlarning siniq qalbiga xursandlik va shodlik baxsh etish ko‘paymoqda. Bu jarayonda davlat tomonidan ham ko‘plab xayrli ishlar amalga oshirilmoqda. Xususan, yordamga muhtoj oilalarni “Temir daftar”dan chiqarish, uy-joy bilan taʼminlash, nochor oilalar vakillari uchun ish o‘rinlari yaratish, vaqti-vaqti bilan holidan xabar olib turish qatʼiy odat tusini olayapti.
Qamashi tumanilik To‘lqin Ro‘zimurodov hamda Gulsara Choriyevalar boshqalarga ibrat bo‘lgulik oila, desak aslo mubolag‘a emas. Ularning to‘rt nafar farzandlari bo‘lib, barchalari hayotda munosib o‘rinlarini topishgan. Dildora o‘qituvchi, Yulduz bank xodimasi, Fatxulla esa neft-gaz sohasini tanlagan. Uchalasi ham oliy maʼlumotli, o‘z ishining ustasi bo‘lgan mutaxassislardir. Kenjatoy Charos esa hozirda maktab o‘quvchisi. Farzandlar kamolida, shubhasiz ota-onaning mehnati, yaratib berilgan imkoniyatlardan oqilona foydalanish ustuvor deyish mumkin.
Bu oilada go‘zal anʼanalar va yuksak tarbiya bilan birgalikda mehr-muhabbat ham oilaning qadriyatlaridan. Shundan kelib chiqib, Ro‘zimurodovlar oilasi qatʼiy qarorga kelishdi. Yaʼni, Mehribonlik uyidan kam emas, besh nafar o‘g‘il-qizlarni asrab olishdek savobli ishga qo‘l urishdi. Er-xotin zimmasiga esa yana-da ulkanroq masʼuliyatlar yuklandi. Oiladagi jipslik, o‘zbekona qadriyatlarga, mehr-muhabbatga yo‘g‘rilgan muhit tufayli qisqa fursatda farzandlar oilaga moslashib ketishdi.
-Zebo qizimni tikuvchilik hunarini o‘rganishga qo‘ydim, -deydi biz bilan suhbatda Gulsara Choriyeva. -Marjona esa musiqa maktabining chang to‘garagiga, Madina skripka to‘garagiga qatnashmoqda. Har ikkisi ham o‘n bir yoshda, tengdosh. O‘n yoshli o‘g‘limiz Ruslan esa sport maktabida, shaxmat-shashka to‘garagi aʼzosi. Hammalarining maktabdagi o‘qishlari yaxshi. 6 yoshli Shamshirbek bog‘cha tarbiyalanuvchisi.
Darvoqe, oiladagi go‘zal tarbiya va mehr mevasini berdi. O‘tgan yili Ruslan va Shamshirbekning sunnat to‘yi o‘tkazilgan bo‘lsa, yaqinda Zeboni turmushga uzatishdi. Hozirda Zebo bir oilaning bekasi bo‘lib, ota-onasiga rahmat olib kelmoqda.
Yaxshilik, ezgulik hech qachon mukofotsiz qolmagan. T.Ro‘zimurodov va G.Choriyevalarning bu ulkan savobli ishlari ham ming chandon bo‘lib qaytishiga ishonamiz.
