Яхшилик, эзгулик ҳеч қачон мукофотсиз қолмаган
Халқимиз азалдан саховати билан шуҳрат қозонган. Сўнгги йилларда кам таъминланган, ёрдамга муҳтож оилаларга, етимлар ва меҳрибонлик уйларига ёрдам кўрсатиш анъанаси яна ҳам кенг оммалашди. Одамларнинг синиқ қалбига хурсандлик ва шодлик бахш этиш кўпаймоқда. Бу жараёнда давлат томонидан ҳам кўплаб хайрли ишлар амалга оширилмоқда. Хусусан, ёрдамга муҳтож оилаларни “Темир дафтар”дан чиқариш, уй-жой билан таъминлаш, ночор оилалар вакиллари учун иш ўринлари яратиш, вақти-вақти билан ҳолидан хабар олиб туриш қатъий одат тусини олаяпти.
Қамаши туманилик Тўлқин Рўзимуродов ҳамда Гулсара Чориевалар бошқаларга ибрат бўлгулик оила, десак асло муболаға эмас. Уларнинг тўрт нафар фарзандлари бўлиб, барчалари ҳаётда муносиб ўринларини топишган. Дилдора ўқитувчи, Юлдуз банк ходимаси, Фатхулла эса нефть-газ соҳасини танлаган. Учаласи ҳам олий маълумотли, ўз ишининг устаси бўлган мутахассислардир. Кенжатой Чарос эса ҳозирда мактаб ўқувчиси. Фарзандлар камолида, шубҳасиз ота-онанинг меҳнати, яратиб берилган имкониятлардан оқилона фойдаланиш устувор дейиш мумкин.
Бу оилада гўзал анъаналар ва юксак тарбия билан биргаликда меҳр-муҳаббат ҳам оиланинг қадриятларидан. Шундан келиб чиқиб, Рўзимуродовлар оиласи қатъий қарорга келишди. Яъни, Меҳрибонлик уйидан кам эмас, беш нафар ўғил-қизларни асраб олишдек савобли ишга қўл уришди. Эр-хотин зиммасига эса янада улканроқ масъулиятлар юкланди. Оиладаги жипслик, ўзбекона қадриятларга, меҳр-муҳаббатга йўғрилган муҳит туфайли қисқа фурсатда фарзандлар оилага мослашиб кетишди.
-Зебо қизимни тикувчилик ҳунарини ўрганишга қўйдим, -дейди биз билан суҳбатда Гулсара Чориева. -Маржона эса мусиқа мактабининг чанг тўгарагига, Мадина скрипка тўгарагига қатнашмоқда. Ҳар иккиси ҳам ўн бир ёшда, тенгдош. Ўн ёшли ўғлимиз Руслан эса спорт мактабида, шахмат-шашка тўгараги аъзоси. Ҳаммаларининг мактабдаги ўқишлари яхши. 6 ёшли Шамширбек боғча тарбияланувчиси.
Дарвоқе, оиладаги гўзал тарбия ва меҳр мевасини берди. Ўтган йили Руслан ва Шамширбекнинг суннат тўйи ўтказилган бўлса, яқинда Зебони турмушга узатишди. Ҳозирда Зебо бир оиланинг бекаси бўлиб, ота-онасига раҳмат олиб келмоқда.
Яхшилик, эзгулик ҳеч қачон мукофотсиз қолмаган. Т.Рўзимуродов ва Г.Чориеваларнинг бу улкан савобли ишлари ҳам минг чандон бўлиб қайтишига ишонамиз.
