YANGI O‘ZBEKISTONDA EL AZIZ, INSON AZIZ!
Yurtimiz kelajagi bo‘lmish har bir o‘sib kelayotgan yoshlarning hayotda munosib o‘rin egallashi ayni chog‘da jamiyat va davlatning doimiy eʼtiboridagi ustuvor masala hisoblanadi. Ularni kasb tanlashga yo‘naltirish esa muhim ahamiyatga ega. Kuni kecha Sirdaryo viloyati bo‘yicha Milliy gvardiya boshqarmasida mustaqilligimizning 31 yilligi munosabati bilan "Yangi O‘zbekistonda el aziz, inson aziz shiori ostida" ochiq eshiklar kuni" tashkil etildi. Respublika o‘g‘il bolalar o‘quv-tarbiya muassasasi tarbiyalanuvchilari ishtirok etgan tadbir davomida harbiy xizmatchilar bilan uchrashib, ularning harbiy mashg‘ulotlari, eng so‘ngi zamonaviy qurollar va harbiy texnikalar bilan tanishishdi, hamda o‘zlarini qiziqtirgan savollariga batafsil javob olishdi. Shuningdek, qaxramonlar maydonchasini ziyorat qilib, H.Suyarov va X.Suyunovlarning ko‘rsatgan jasoratlarini yana bir bor yod etishdi. So‘ngra harbiy qism kutubxonasida eng so‘ngi jahon hamda o‘zbek adabiyoti durdonalari bilan yaqindan tanishishdi. Keyingi manzil viloyatimizda joylashgan IT park markazida davom etib, sayohat davomida bolalarga u yerda qanday to‘garaklar faoliyat ko‘rsatishi, mashg‘ulotlar qay tarzda olib borilayotgani, olingan bilimlar kelajakda nechog‘lik foydali ekanligi haqida so‘zlab berildi. Shu bilan bir qatorda, bolajonlarni to‘garakdagi mashg‘ulotlarga qiziqtirish, o‘z iqtidorini sinab ko‘rish imkoniyatini yaratish maqsadida to‘garak sardorlari tomonidan bolalar bilan sinov darslari o‘tkazildi.
Tadbir so‘ngida "Yosh kitobxon" tanlovi g‘olibi, "Mard o‘g‘lon" davlat mukofoti sohibi Yorqinjon Hayitboyev bilan uchrashuv tashkil etildi. Yorqinjon o‘zining sheʼrlari va treningi bilan ishtirokchilarda yorug‘ kelajakka ishonch hissini yana-da kuchaytirib, katta taassurotlar og‘ushida yangi marralarga intilish lozim ekanligini taʼkidlab o‘tdi.
