YURTIMIZDAGI BARCHA MAKTABLARDA BILIMLAR KUNI O‘TKAZILDI
Yozni maroq bilan o‘tkazgan bolajonlar hayajon va quvonch bilan birinchi qo‘ng‘iroq sadolari ostida umumtaʼlim maktablarida bilimlar kunini o‘tkazishdi.
Bu damlar, ayniqsa, maktab atalmish muqaddas dargohga ilk bor qadam qo‘ygan kichkintoylar uchun yana-da hayajonli, orziqib kutilgan va unutilmasdir. Ilk qo‘ng‘iroq sadosi ko‘zlari charaqlab turgan birinchi sinf o‘quvchilari qalbida bong uradi. Endi ular aka-opalariga o‘xshashga, ulardek “aʼlo” o‘qishga intiladi. Poytaxtimizdagi 30-sonli mehribonlik uyi tarbiyalanuvchilarining qalblarida ham anashunday his-tuyg‘ular jo‘sh urdi. Ular ilk bor umumiy o‘rta taʼlim maktablariga yo‘l olishdi. Yashnobod tumanidagi 226-sonli umumiy o‘rta taʼlim maktabiga qabul qilingan o‘quvchilar quvonchiga sherik bo‘ldik.
«Birinchi qo‘ng‘iroq» tadbirlarida o‘qituvchilar, o‘quvchilar va ularning ota-onalari qatnashdi. Shundan so‘ng «Mustaqillik darslari» o‘tkazildi. Ushbu darslarda istiqlol yillarida erishilgan yutuqlar, yoshlarimiz tomonidan qo‘lga kiritilgan katta g‘alabalar, o‘quvchilarning fan olimpiadalaridagi muvaffaqiyatlari so‘zlab berildi.
1-sinfiga qabul qilingan o‘quvchilarga o‘quv qurollari, maktab sumkasi, darsliklar majmuasidan iborat Prezident sovg‘alarini topshirildi. Ularni bolajonlar qabul qilib olarkan, dillarida cheksiz quvonch, ertangi kunga yorug‘ umid va ishonch barq uradi.
