“KAMALAK” BOLALAR OROMGOHIDA SPORT MUSOBAQALARI O‘TKAZILDI
Toshkent viloyatining Bo‘stonliq tumanida joylashgan va joriy yilning may oyidan boshlab O‘zbekiston Respublikasi Milliy gvardiyasiga qarashli “Kamalak” bolalar sog‘lomlashtirish oromgohida maʼnaviy-maʼrifiy hamda sport tadbirlari bo‘lib o‘tdi.
Mazkur tadbir Milliy gvardiya Toshkent viloyati bo‘yicha boshqarmasi tomonidan tashkil etildi.
“Kamalak” bolalar oromgohida 220 nafar qiz va o‘g‘il bolalar 3 bosqichda dam olib, ular sport musobaqalariga, "qiziqarli startlar" estafetalariga, intellektual va ijodiy tanlovlarga muntazam ravishda jalb qilinmoqda. Bolajonlarning qiziqishlari turli xil: baʼzilari rasm chizishdi, sheʼrlar o‘qishdi, boshqalari shaxmat,suzish va qo‘l jangi musobaqalarida ishtirok etdi.
Har bir inson, ayniqsa, yoshlar kamondan otish musobaqalarida ishtirok etishni yaxshi ko‘radi. Musobaqa oldidan harbiy xizmatchilar bolalarga kamondan otish sport turining tarixi, rivojlanishi haqida so‘zlab berib, mashg‘ulotlar davomida faol bo‘lgan ishtirokchilar amaliy mashqlarda imkoniyatlarini sinab ko‘rishdi.
Oromgohda faoliyat ko‘rsatayotgan to‘garaklarda shug‘ullanayotgan yosh avlod o‘z mahoratini namoyish etishdi. Yigitlarning samolyotlarni modellashtirish darsida o‘z qo‘llari bilan tayyorlagan samolyotlari, ularning sevimli multfilmlari asosida yog‘och, loydan yasalgan hunarmandchilik buyumlari barchaning eʼtirofiga sazovor bo‘ldi.
Qizlar ham yigitlardan qolishmagan holda yaqinlari va do‘stlari uchun qo‘l mehnati asosida turli zargarlik buyumlarini yasashdi.
Shuni alohida taʼkidlash joizki, bolajonlar uchun eng esda qolarli kun harbiy xizmatchilar bilan dildan kechgan suhbat bo‘ldi.
Ochiq muloqot davomida bolalar bir-birlariga navbat bermagan holda, harbiy xizmatchilardan qanday qilib irodani chiniqtirish mumkinligi, Vatan himoyachilari safiga qo‘shilish uchun nimalarga ahamiyat berish lozimligi, kuchli va jasur bo‘lib yetishish uchun qaysi sport turi bilan shug‘ullanish kerakligi bo‘yicha savollar berib, kerakli maʼlumotlarga ega bo‘lishdi
