Konstitutsiya kuniga bag‘ishlangan ko‘rik-tanlovda “Mehribonlik” uyi tarbiyalanuvchilari ishtirokidagi maktab jamoasi g‘olib bo‘ldi.
10-sonli umumtaʼlim maktabida tahsil oluvchi Chirchiq shahridagi 14-sonli “Mehribonlik” uyi tarbiyalanuvchilari Bosh qomusimiz bo‘yicha “Konstitutsiya-baxtimiz qomusi” nomli bilimlar bellashuvida qatnashdilar.
Ko‘rik-tanlovdan ko‘zlangan asosiy maqsad, Konstitutsiyaning har bir o‘zbekistonlik hayotidagi muhim roli haqida maʼlumot berish va yoshlarda faol fuqarolik pozitsiyasini shakllantirishdan iborat. Bolalar ko‘rik-tanlovga jiddiy tayyorgarlik ko‘rishdi, ular Asosiy qonunimiz moddalarini yod olibgina qolmay, har birining mazmun mohiyatini chuqur tushunish va tahlil qilishga urundilar. Ular konstitutsiya tarixi, unga kiritilgan qo‘shimcha va o‘zgartishlar haqida ko‘p o‘qidilar. Natijada esa, shaharning ijtimoiy-iqtisodiy rivojlantirish bo‘yicha 2-sektoriga qarashli sakkizta maktab orasida 10-sonli maktab o‘quvchilari birinchilikni egalladilar.
