Mahalliy Kengashlar deputatlari uchun seminar tashkil etildi
Joriy yilning 12-iyun kuni Senatning Yoshlar, xotin-qizlar, madaniyat va sport masalalari qo‘mitasi tomonidan “Bolalarni zo‘ravonlikning barcha shakllaridan himoya qilish to‘g‘risida”gi Qonun ijrosini nazorat qilishda deputatlarning o‘rni” mavzusiga bag‘ishlangan seminar o‘tkazildi.
Seminardan ko‘zlangan maqsad mahalliy Kengashlar deputatlarining soha bo‘yicha qonunchilikdagi yangiliklar va o‘zgarishlar yuzasidan nazariy bilimlarini hamda amaliy ko‘nikmalarini oshirish hamda mazkur Qonunning hududlarda samarali ijro etilishi ustidan deputatlik nazoratini olib borishdan iborat.
Seminar davomida Oliy Majlisning Bola huquqlari bo‘yicha vakili, masʼul tashkilotlar vakillarining mavzuga doir maʼruzalari hamda senatorlar, ekspertlar, Yoshlar parlamenti aʼzolarining fikr-mulohazalari eshitildi.
Taʼkidlanganidek, hududlarda bolalarning huquqlari, erkinliklari va qonuniy manfaatlarini taʼminlashda mahalliy davlat hokimiyati organlarining bu boradagi faoliyati ulkan ahamiyatga ega.
2024-yil noyabrida qabul qilingan va joriy yilning 15-may kuni kuchga kirgan “Bolalarni zo‘ravonlikning barcha shakllaridan himoya qilish to‘g‘risida”gi Qonun bolalar huquqlari, erkinliklari va qonuniy manfaatlariga rioya etish hamda ularni hurmat qilishning huquqiy asoslarini takomillashtirish, bolalarga nisbatan zo‘ravonlik holatlariga murosasiz munosabatda bo‘lish va zo‘ravonlik sodir etgan shaxslarga nisbatan javobgarlikning muqarrarligini taʼminlashga xizmat qilayotgani qayd etildi.
“O‘zbekiston Respublikasi Oliy Majlisining Bola huquqlari bo‘yicha vakili (Bolalar ombudsmani) to‘g‘risida”gi Qonunga ko‘ra esa Bola huquqlari bo‘yicha vakilning Qoraqalpog‘iston Respublikasi, viloyatlar va Toshkent shahridagi vakillarini tayinlash belgilangan. Shu munosabat bilan Bolalar ombudsmani tomonidan barcha hududlarda tayinlangan vakillar seminar ishtirokchilariga tanishtirildi. Shuningdek, Bola huquqlari bo‘yicha vakilning mintaqaviy vakillari faoliyatini tashkil etish yuzasidan tegishli tavsiyalar hamda huquqlari va vazifalari bo‘yicha tushuntirishlar berildi.
Seminar davomida ushbu Qonunning ijrosini deputatlar tomonidan nazorat qilib borish muhimligi taʼkidlanib, bir qator tavsiyalar ilgari surildi.
Xususan, Qonunning mazmun-mohiyatini aholi o‘rtasida tushuntirish, targ‘ibot-tashviqot ishlarini olib borish, hududlarda ijro etilishi ustidan deputatlik nazoratini o‘rnatish, ijtimoiy himoyaga muhtoj bolalarni va ularning oilalarini qo‘llab-quvvatlash masalalarini nazorat-tahlil tartibida o‘rganib borish, shuningdek, mintaqaviy vakillarning tegishli hududda bola huquqlari, erkinliklari va qonuniy manfaatlarining himoya qilinishi holati to‘g‘risidagi maʼruzalarini ko‘rib chiqish va muammolarni bartaraf etish bo‘yicha taʼsirchan choralar ko‘rish yuzasidan tavsiyalar berildi.
