“Mehr daftari” elektron platformasiga kiritilgan kogonlik 12 nafar o‘g‘il-qizlarning orzulari ro`yobga chiqdi.
Davlatimiz rahbari tashabbusi bilan yurtimizda yetim va ota-ona qaramogʻidan mahrum boʻlgan bolalar alohida eʼtiborga olinib, ularni davlat tomonidan qoʻllab-quvvash boʻyicha mutlaqo yangi tizim sifatida “Mehr daftari” platformasi joriy qilingani oʻz samarasini bermoqda.
Statistik maʼlumotlarga nazar solsak, turli sababga koʻra ota-ona qaramogʻidan mahrum boʻlgan va ijtimoiy muhofazaga olingan voyaga yetmaganlar soni viloyatda 301 nafarni tashkil qilayotgan boʻlsa, ularning barchasi vasiylikka olingan va tutingan ota-onalari bagʻrida oʻsib-ulgʻaymoqdalar. Yetim va ota-ona qaramogʻidan mahrum boʻlgan bolalarni “Mehr daftari”ga kiritish toʻgʻrisidagi qarorlar qabul qilingan boʻlib, shu asosida ularda mavjud muammolar, qolaversa, kundalik ehtiyoj va talablarini oʻrganish va hal qilishga qaratilgan “Yoʻl xaritasi” ishlab chiqilgan.
Vasiylikka olingan bolalarning har biriga oʻtgan yil davomida davlatimiz tomonidan 1 million 380 ming soʻm oylik nafaqa puli ham tayinlangani, vasiylikda istiqomat qilayotgan turar joy kommunal toʻlovlarigacha qoplab berilgani ularga koʻrsatilayotgan eʼtibor va gʻamxoʻrlikning ifodasi, albatta. Bu saʼy-harakat joriy yilda ham izchil davom ettirilmoqda.
Jumladan, Kogon tumanida ayni kunda qonuniy tartibda vasiylikka olingan 12 nafar voyaga yetmagan oʻsmirning kundalik yashash tarzi, taʼlim-tarbiyasi va moddiy taʼminoti doimiy nazoratga olingan boʻlib, ularning orzu-istaklarini roʻyobga chiqarishga qaratilgan xayrli amallarga guvoh boʻlish mumkin. Viloyat va tuman hokimligi, Milliy gvardiya Buxoro viloyati boʻyicha boshqarmasi masʼullari ishtirokida "Mehr daftari"dan oʻrin olgan mazkur yoshlar holidan xabar olinib, ularga velosiped, noutbuk, kompyuter jamlanmasi, planshet, mikrotoʻlqinli pech, tikuv mashinasi, dars tayyorlash uchun stol–stul va yana boshqa, jami 40 million 800 ming soʻmlik zarur jihoz va buyumlar yetkazib berildi.
— Farzandlarimiz alohida mehr va eʼtibor qurshovida ekanliklari barobarida davlat va jamiyatimizning doimiy koʻngil soʻrab, ragʻbatlantirishlaridan bahramand holda oʻsib – ulgʻayayotganliklari kelgusida albatta, ularning shu yurt koriga kamarbasta boʻlishlariga ishonch tugʻdiradi, – deydi vasiylikka olgan oilalardan birining bekasi Subhiya Hamroyeva. — Aytish joizki, bu jihozlar bolajonlarning taʼlim-tarbiya olishlari va hayotda oʻz kasb-korlarini tanlashlari uchun xizmat qiladi.
