“Меҳр дафтари” электрон платформасига киритилган когонлик 12 нафар ўғил-қизларнинг орзулари рўёбга чиқди.
Давлатимиз раҳбари ташаббуси билан юртимизда етим ва ота-она қарамоғидан маҳрум бўлган болалар алоҳида эътиборга олиниб, уларни давлат томонидан қўллаб-қувваш бўйича мутлақо янги тизим сифатида “Меҳр дафтари” платформаси жорий қилингани ўз самарасини бермоқда.
Статистик маълумотларга назар солсак, турли сабабга кўра ота-она қарамоғидан маҳрум бўлган ва ижтимоий муҳофазага олинган вояга етмаганлар сони вилоятда 301 нафарни ташкил қилаётган бўлса, уларнинг барчаси васийликка олинган ва тутинган ота-оналари бағрида ўсиб-улғаймоқдалар. Етим ва ота-она қарамоғидан маҳрум бўлган болаларни “Меҳр дафтари”га киритиш тўғрисидаги қарорлар қабул қилинган бўлиб, шу асосида уларда мавжуд муаммолар, қолаверса, кундалик эҳтиёж ва талабларини ўрганиш ва ҳал қилишга қаратилган “Йўл харитаси” ишлаб чиқилган.
Васийликка олинган болаларнинг ҳар бирига ўтган йил давомида давлатимиз томонидан 1 миллион 380 минг сўм ойлик нафақа пули ҳам тайинлангани, васийликда истиқомат қилаётган турар жой коммунал тўловларигача қоплаб берилгани уларга кўрсатилаётган эътибор ва ғамхўрликнинг ифодаси, албатта. Бу саъй-ҳаракат жорий йилда ҳам изчил давом эттирилмоқда.
Жумладан, Когон туманида айни кунда қонуний тартибда васийликка олинган 12 нафар вояга етмаган ўсмирнинг кундалик яшаш тарзи, таълим-тарбияси ва моддий таъминоти доимий назоратга олинган бўлиб, уларнинг орзу-истакларини рўёбга чиқаришга қаратилган хайрли амалларга гувоҳ бўлиш мумкин. Вилоят ва туман ҳокимлиги, Миллий гвардия Бухоро вилояти бўйича бошқармаси масъуллари иштирокида "Меҳр дафтари"дан ўрин олган мазкур ёшлар ҳолидан хабар олиниб, уларга велосипед, ноутбук, компьютер жамланмаси, планшет, микротўлқинли печь, тикув машинаси, дарс тайёрлаш учун стол–стул ва яна бошқа, жами 40 миллион 800 минг сўмлик зарур жиҳоз ва буюмлар етказиб берилди.
— Фарзандларимиз алоҳида меҳр ва эътибор қуршовида эканликлари баробарида давлат ва жамиятимизнинг доимий кўнгил сўраб, рағбатлантиришларидан баҳраманд ҳолда ўсиб – улғаяётганликлари келгусида албатта, уларнинг шу юрт корига камарбаста бўлишларига ишонч туғдиради, – дейди васийликка олган оилалардан бирининг бекаси Субҳия Ҳамроева. — Айтиш жоизки, бу жиҳозлар болажонларнинг таълим-тарбия олишлари ва ҳаётда ўз касб-корларини танлашлари учун хизмат қилади.
