Mehr-oqibat olamni go‘zalroq, insonlarni esa bahtliroq qiladi
Bundan bir yil muqaddam 25 avgustda O‘zbekistonda birinchi “TASKIN” xospisi tashkil etilgan edi. O‘tgan bir yil davomida “Taskin” da 70 ga yaqin onkologik kasallikka chalingan bolajonlar palliativ yordam oldilar, afsuski shundan 40 nafar jajji farishtalar hayotni tark etdilar.
Ushbu satrlar xospis tashkilotchisi Ezgu Amal fondi saytidan olingan bo‘lib, fond saytiga havola bilan Toshkent shahrida yashovchi Atayevlar oilasi bo‘lishdi.
Nurulla va Kamila Atayevlar 21 va 22-sonli “Mehribonlik” uylarining 5 nafar hamda SOS bolalar mahallasining barcha tarbiyalanuvchilarini mehr va muhabbat bilan o‘z bag‘rlariga olib, oilaviy bolalar uyini tashkil qilgan juftlik hisoblanadilar.
Ular xospis eshiklari ochilgan ilk kunlardanoq bu yerdagi bolajonlar holidan xabar olib keladilar. Atayevlarning o‘g‘il-qizlari bo‘lmish xospisdagi bolajonlar uchun muloqot va tabassum juda quvonchlidir. Shuni inobatga olgan oilaviy bolalar uyi farzandlari bu yerdagi bolajonlarga turli qo‘shiqlar va o‘yin-kulgu bilan ko‘tarinki kayfiyat ulashishga harakat qiladilar.
Xospisning ilk tug‘ilgan kuniga mazkur oilaning farzandlari bo‘lmish 15 yoshli Aleksey, 14 yoshli Denis va 16 yoshli Asadbek ayiqlar kostyumida animatorlar rolini bajarib, xospisdagi bolajonlar bilan raqsga tushib, ularning ko‘nglini ko‘tardilar. Oilaning qizalog‘i Xumayra esa bayram tadbirida ota-ona, do‘stlik va Vatanga muhabbat tuyg‘ularini tarannum etuvchi qo‘shiqlarni ijro etdi.
Tadbir yakunida Ezgu Amal fondi tomonidan xospisning sodiq do‘stlari bo‘lmish oilaviy bolalar uyi farzandlariga “Taskin”ning rivoji yo‘lida qo‘shayotgan hissalari uchun tashakkurnoma topshirildi.
O‘z navbatida ota-onalar farzandlari ongiga singdirishayotgan mehr-oqibat, sof fikrlilik, ezgulik singari sifatlar bolalari qalblarida aks-sado berayotganidan juda faxrlanishdi.
