Respublikamizning barcha hududlarida “Mehr daftari” elektron platformasi maʼlumotlar bazasini yaratish tartibi va tamoyillarini o‘rganish bo‘yicha o‘quv- seminarlari o‘tkazilmoqda. Seminar tashkilotchilarining vazifasi ota-ona qaramog‘isiz qolgan bolalarni qo‘llab-quvvatlash tizimining mohiyati va ahamiyatini masʼullarga yetkazishdan iborat. “Mehr daftari” bolalarga o‘zi uzoq vaqtdan beri orzu qilgan biror buyumni shunchaki taqdim etish uchun emas, balki uning yangi bilim, ko‘nikmaga bo‘lgan istagini qo‘llab-quvvatlash va bolalarning ijtimoiylashuviga hissa qo‘shish uchun joriy qilingan. Bundan tashqari, tizim bolalarni vasiylikka olgan yoki vasiylikni rasmiylashtirgan oilalarni rag‘batlantirishni nazarda tutadi.

O‘quv -seminarining navbatdagi kurslari Farg‘ona, Andijon, Namangan, Xorazm, Sirdaryo, Buxoro, Navoiy, Jizzax viloyatlarida bo‘lib o‘tdi. Seminarlar Jamoat xavfsizligi universiteti professor-o‘qituvchilari hamda Milliy gvardiya Markaziy devoni tarbiyaviy-mafkuraviy ishlar boshqarmasi vakillari ishtirokida o‘tkazildi.

Seminar ishtirokchilariga Vazirlar Mahkamasining 2022-yil 17-fevraldagi “Yetim bolalar va ota-ona qaramog‘idan mahrum bo‘lgan bolalarni har tomonlama qo‘llab-quvvatlashga qaratilgan «Mehr daftari» tizimini joriy etish chora-tadbirlari to‘g‘risida” gi Qarori mazmun mohiyati atroflicha tushuntirildi. Shuningdek, “Mehr daftari” maʼlumotlar bazasini shakllantirish, elektron platformadan chiqarish tartibi va tamoyillariga alohida eʼtibor qaratildi. Seminar ishtirokchilariga tizimdan ko‘zlangan maqsad bolalarning orzu va intilishlarini ro‘yobga chiqarish, ijtimoiylashuviga ko‘maklashish, ularni o‘z tarbiyasiga olgan oilalarni rag‘batlantirishdan iborat ekani taʼkidlandi. Ishtirokchilar, shuningdek, ota-onalar va boshqa qonuniy vakillarning bolalarni vasiylikdan mahrum qilish sabablarini o‘rganish usullari hamda aniqlangan muammolarni bartaraf etish va oldini olish bo‘yicha kompleks chora-tadbirlar to‘g‘risidagi maʼruzani tingladilar. Taʼkidlanganidek, joriy yilning sentyabr oyidan boshlab oilaviy bolalar uylari faoliyati va “Mehr daftari” jamg‘armasi mablag‘larining maqsadli sarflanishi ustidan deputatlik nazorati o‘rnatildi. Seminar davomida ishtirokchilar o‘zlarini qiziqtirgan savollarni berish va ularga atroflicha javob olish, ish tajribasi va muammolarni hal etish chora-tadbirlarini hamkasblari bilan muhokama qilish imkoniga ega bo‘ldilar.

Eslatib o‘tamiz, mazkur seminar Vazirlar Mahkamasining 2022-yil 17-fevraldagi “Yetim bolalar va ota-ona qaramog‘idan mahrum bo‘lgan bolalarni har tomonlama qo‘llab-quvvatlashga qaratilgan «Mehr daftari» tizimini joriy etish chora-tadbirlari to‘g‘risida” gi 26-sonli Qarori hamda hokimlik va boshqa manfaatdor tuzilmalarning bolalarni himoya qilish sektorlari mutaxassislari uchun Milliy gvardiya qo‘mondonining tegishli buyrug‘iga asosan tashkil etilmoqda.

Respublikamizning barcha hududlarida o‘quv- seminarlari davom etmoqda.