Mehribonlik uyi tarbiyalanuvchilari mustaqil hayotga tayyorlanmoqda
Poytaxtimizda joylashgan 22-sonli Mehribonlik uyi tarbiyalanuvchilari bilan muntazam ravishda mustaqil hayot ko‘nikmalarini o‘rgatishga qaratilgan mashg‘ulotlar o‘tkazilib kelinadi. Bolalarga o‘zini parvarishlash, kiyimlarni toza va tartibli tutish, ovqat pishirish, uyning tozaligi va saranjomligiga amal qilish hamda xarajatlar byudjetini yuritish ko‘nikmalari o‘rgatilmoqda. Bunday turdagi mashg‘ulotlarni o‘tkazishga ko‘pincha turli xil tashkilot va idoralardan mutaxassislar taklif qilinadi.
Xususan, yaqinda bolalarga qandolatchilik ishlarini o‘rgatish uchun “Safia Cafe & Bakery” konditerlik fabrikasi mutaxassislari chaqirildi. Mazali shirinliklar pishirish hamda tort va boshqa pishiriqlarni bezatishni xohlovchilar ko‘p bo‘ldi. Konditer mutaxassislar bolalarning qiziqishlaridan mamnunligi hamda xohlovchilar orasida konditerlik sohasini kasb sifatida egallovchilar chiqishidan umidvor ekanligini bildirishdi.
