“Mehribonlik” uylarining sobiq bitiruvchilari yangi xonadonlar bilan ta’minlandi
Davlatimiz rahbari topshirig‘iga asosan, Milliy gvardiya va hokimlik organlari vakillaridan iborat ishchi guruh tomonidan 30 yoshgacha bo‘lgan Mehribonlik uyi sobiq bitiruvchilarining turmush sharoitini o‘rganish bo‘yicha ishlar amalga oshirildi. O`rganishlar davomida uy-joy bilan ta'minlanmagan yoki yashash uchun mo'ljallanmagan, shuningdek, belgilangan sanitariya-gigiyena talablariga, yong'in xavfsizligi qoidalariga javob bermaydigan binolarda yashovchilar ro`yxati shakllantirildi. Mehribonlik uyi sobiq bitiruvchilarini uy-joy bilan ta’minlash masalasini hal etish bo`yicha choralar ko‘rilmoqda, deb xabar beradi Mehribonlik.uz sayti.
Bugun Toshkent viloyati Ohangaron shahrida Mehribonlik uyining sobiq bitiruvchilari Aziza Qayumova va Go‘zal Sharipova o`z xonadonlariga ega bo‘lishdi.
Aziza 15-sonli Mehribonlik uyi tarbiyalanuvchisi. Uch farzandini yolg`iz tarbiyalayotgan Aziza avgust oyida 30 yoshga to‘ladi. So'nggi yillarda u uzoq qarindoshinikida yashab kelgan. Qarindoshning uyi katta emas – besh xonali. Ammo u erda 11 kishidan iborat katta oila yashaydi.
Aziza bolalari bilan oshxona uchun mo`ljallangan xonadan qo`nim topdi. Albatta, bu yerdagi sharoit standartlarga umuman javob bermaydi. Aziza butunlay umidini uzdi, chunki qurilish materiallari do'konida farrosh bo`lib ishlagan ayolning maoshiga uy sotib olishning iloji yo'q edi.
Go‘zal ham Azizaga singari uch farzandini yolg‘iz tarbiyalab kelmoqda. U 14-sonli Mehribonlik uyida ulg‘aygan va onasiz bolaga qanchalik og‘ir ekanligini yaxshi biladi. Ayni vaqtda Go`zal bola parvarishlash uchun tug'ruq ta'tilida. 26 yoshli qahramonimiz uzoq yillar davomida alohida hammom va hojatxonasi bor bo'lgan qulay xonadonga, o'z oshxonasiga ega bo'lishni orzu qilgan. U hojatxona va oshxonasi umumiy bo‘lgan, biroq hammomi umuman bo`lmagan yotoqxonada yashashdan charchagan edi.
Bugun qahramonlarimiz har qachongidan ham baxtli: ular Ohangaron shahridagi “Yoshlik” mahallasidan bir xonali uyga ega bo‘lishdi.
Yangi xonadonlar kaliti Toshkent viloyati hokimligi mutasaddilari , Ohangaron shahar sektor rahbarlari, mahalla faollari hamda keng jamoatchilik vakillari ishtirokida o`z egalariga tantanali topshirildi.
