Milliy gvardiya vakillari oilaviy uylarni eʼtiborsiz qoldirmaydi
Yangi o‘quv yili arafasida Milliy gvardiya vakillari oilaviy uylarga tashrif buyurib, bolalarning maktabga tayyorligi hamda ularning o‘qishi va dam olishi uchun yaratilgan sharoitlarni o‘rganishdi. Xususan, Milliy gvardiya Markaziy devoni Yoshlar va bolalar muassasalari bilan ishlash boshqarmasi boshlig‘i polkovnik A. Pirmatov boshchiligidagi ishchi guruh Toshkent shahar Uchtepa tumani Nayman mahallasida istiqomat qiluvchi 7 ta oilaviy uylarga tashrif buyurishdi.
Ota-onalar va bolalar bilan uchrashuvda barcha kerakli buyumlar, maktab uchun usti-bosh va oyoq kiyimlar hamda kuz mavsumi uchun sport formasi, kompyuterlar va internetga kirish uchun sharoitlar mavjudligi ko‘zdan kechirildi. Birinchi sinfga boradigan bolalarga alohida eʼtibor qaratilib, tarbiyalanuvchilarning axloqiy va ruhiy holati, uydagi vaziyat, yozgi taʼtilni qanday o‘tkazganligi, o‘quv yiliga tayyorgarligi borasida suhbatlar olib borildi.
Maʼsullar tashrif davomida tibbiy ko‘riklarning o‘z vaqtida tashkil etlayotgani va shifokorlarning ko‘rsatmalariga rioya qilish holatini ham o‘rganishdi. Bundan tashqari, hokimlarning oilaviy uy tashkil etish to‘g‘risidagi qarorlari, farzand asrab oluvchi ota-onalar kurslarini tamomlaganlik va malaka oshirish kurslarini davom ettirganlik to‘g‘risidagi sertifikatlar kabi hujjatlar mavjudligi ko‘rib chiqildi.
Ishchi guruh tomonidan har bir murojaat diqqat bilan tinglanib, ularning bir qismi joyida hal qilindi, qolganlari bo‘yicha mutasaddi tashkilotlar bilan hamkorlikda ijrosi qisqa fursatda taʼminlanadigan bo‘ldi. Ota-onalarga o‘zlari qiziqtirgan mavjud masalalar bo‘yicha kerakli tushunchalar va maslahatlar berildi.
