Milliy gvardiya harbiy xizmatchilari bolalar va kattalarga qish kunlari yong‘in va is gazidan himoyalanish qoidalarini eslatib o‘tishdi
Ushbu qishning qorli kunlarida Milliy gvardiya harbiy xizmatchilari va xodimlari Respublika bo‘ylab “Mehribonlik” uylari va boshqa taʼlim-tarbiya muassasalari, shuningdek, oilaviy bolalar uylariga tashrif buyurishdi. Ushbu tashriflardan ko‘zlangan maqsad isitish tizimlari, maishiy isitish elektr jihozlarining yaroqliligini tekshirishdir.
Shu bilan birga, Milliy gvardiya vakillari bolalar, tarbiyachilar, tutingan va o‘rnini bosuvchi ota-onalar bilan yong‘in xavfsizligi mavzusida suhbatlar o‘tkazdilar. Ular kattalar va bolalarga qishda yong‘in kelib chiqishining asosiy sabablari, isitish vositalaridan foydalanish bo‘yicha ko‘rsatmalarga rioya qilmaslik qanday oqibatlarga olib kelishi mumkinligi haqida tushunchalar berishdi.
Jumladan, o‘zining va atrofdagilarning hayotiga beparvolik va masʼuliyatsizlik natijasida pechlar, mo‘ri va elektr simlarini o‘z vaqtida yaroqliligini bilmaslik qanday fojiali oqibatlarga olib kelishiga misollar keltirildi.
Shuningdek, is gazining hosil bo‘lishi, nima uchun u “tilsiz qotil” deb atalishi, is gazi bilan zaharlanishning oldini olish uchun qanday choralar ko‘rish zarur ekani tushuntirilmoqda. Harbiy xizmatchilar va xodimlar kattalar va bolalarga yong‘in yoki gaz sizib chiqqan taqdirda darhol murojaat qilinishi kerak bo‘lgan favqulodda vaziyatlar xizmatlari raqamlarini yana bir bor eslatib o‘tishdi.
Gvardiyachilar taqdim etgan fotosuratlarda bo‘lsa, Toshkent shahri hamda Samarqand, Toshkent, Sirdaryo viloyatlaridagi oilaviy bolalar uylari farzandlari va “Mehribonlik” uylari tarbiyalanuvchilari, shuningdek, SOS Assotsiatsiyasining Bolalar shaharchasida o‘tkazilayotgan isitish tizimlari, maishiy isitish elektr jihozlarining yaroqliligini tekshirish jarayonlari va yong‘in xavfsizligi mavzusida bolalar va kattalar ishtirokidagi suhbatlarning borishi bilan tanishishingiz mumkin. Bu kabi tadbirlar respublikamiz bo‘ylab davom etmoqda.
