Farg‘ona viloyatidagi Oilaviy bolalar uylaridan yangiliklar
Farg‘ona viloyatidagi Oilaviy bolalar uyi farzandlari va ularning ota-onalari yaqinda sodir bo‘lgan voqealar bilan o‘rtoqlashdilar.
Avvalo, barcha bolalar chuqurlashtirilgan tibbiy ko‘rikdan o‘tkazilib, malakali shifokorlar nazoratiga olindi. Shu bilan bir qatorda, bolalar bilan sog‘lom turmush tarzi va sanitariya-gigiyena qoidalariga rioya qilishning ahamiyati, o‘sayotgan organizm uchun zararli odatlarning oqibatlari to‘g‘risida profilaktik suhbatlar o‘tkazildi.
Bu kabi tibbiy ko‘riklarning yuqori saviyada tashkillashtirilganligi, bolalardagi muammolarni aniqlash, o‘z vaqtida davolashni boshlash hamda kasalliklarning rivojlanishiga yo‘l qo‘ymaslik imkonini bermoqda.
Shuningdek, Qo‘qon shahrida yashovchi Mansurovlar oilasi farzandlari Favqulodda vaziyatlar vazirligi vakillarining tashrifi haqida so‘zlab berishdi. Bolalar uchun yong‘in xavfsizligi xizmati mutaxassislarining gaz aloqasi holatini va isitish moslamalarining yaroqliligini tekshirish jarayonini tomosha qilish qiziq bo‘ldi.
Shundan so‘ng, Favqulodda vaziyatlar vazirligi va Milliy gvardiya boshqarmasi vakillari bir piyola choy ustida bolalar va ularning ota-onalari bilan ularni qiziqtirgan barcha mavzular haqida suhbatlashdilar. Bolalar ham o‘z navbatida mehmonlarga o‘qishlari, sevimli mashg‘ulotlari, bo‘sh vaqtlarini qanday o‘tkazishlari, sport va oshpazlik isteʼdodlaridagi muvaffaqiyatlari haqida faxr bilan so‘zlab berishdi.
