Bolalar ombudsmanining Qoraqalpog‘iston Respublikasidagi Oilaviy bolalar uylariga tashrifi.
Kuni kecha Oliy Majlisning Bola huquqlari bo‘yicha vakili (Bolalar ombudsmani) A.Yunusova, Oliy Majlisning Inson huquqlari bo‘yicha vakili-kotibiyatining Bola huquqlarini taʼminlash sektori mudiri S.Rahmatov hamda “Mehribonlik” bolalar muassasalari bilan ishlash boshqarmasi vakili podpolkovnik B.Ashirmatova Qoraqalpog‘iston Respublikasida tashkil etilgan Oilaviy bolalar uylariga tashrif buyurdi.
Tashrifdan ko‘zlangan maqsad bolalarning yashash sharoiti, ularning ota-onalari va boshqa bolalar bilan munosabatlari, yozgi taʼtilni qanday o‘tkazayotganligi hamda bo‘sh vaqtlarida qanday mashg‘ulotlar bilan bandligini o‘rganish. Shu bilan birga, Ota-onalar va bolalar bilan bo‘lgan suhbatda yangi oilalardagi muhit hamda bolajonlarga bo‘layotgan munosabatlar o‘rganildi.
Shu kungacha A.Yunusova boshchiligidagi delegatsiya 5 ta xonadonga tashrif buyurdi. Bular Xo‘jayli tumanida yashovchi 6 nafar farzandni o‘z bag‘riga olgan Jamshid O‘razboyevich va Dilnoza Ibragimovna, 5 nafar farzandni tarbiyalayotgan O‘razbay Xajabaevich va Tursunova Muyassar hamda 6 nafar qizni tarbiyalayotgan Xalmurat Sultonmuratovich va Gulbahor Jumaboevnalar oilasi.
Shuningdek, Bolalar ombudsmani ham Taxiatosh tumanida istiqomat qiluvchi ikki oila: 5 nafar farzandni tarbiyalagan Dildora Baxtiyarovna va Bekzod Muratbayevich hamda 7 nafar farzand tarbiyasi bilan band bo‘lgan Allabay Markabayevich va Arzimova Juzumgullar xonadonida bo‘ldi.
Do‘stona muhitda bo‘lgan suhbatda sog‘lomlashtirish oromgohlarida hordiq chiqargan bolajonlar o‘z taassurotlarini mehmonlarga so‘zlab berdi.
Ayni paytda oromgohga qadar vaqt bor. Bolalar fursatdan foydalanib, o‘z qo‘llari bilan qo‘g‘irchoqlar yasashni, turli mavzularda rasmlar chizishni, shuningdek, cholg‘u asboblarida kuylar chalib qo‘shiqlar kuylashni o‘rganmoqda.
Uchrashuv so‘nggida Bolalar ombudsmani bolalarga badiiy va o‘quv adabiyotlari to‘plamini sovg‘a qildi.
Qoraqalpog‘iston Respublikasiga tashrifi davomida A.Yunusova Taxiatosh tumanida joylashgan Bolalar uyida ham bo‘lib, u yerda bolajonlar uchun yaratilgan sharoitlarni o‘rgandi va tibbiyot xodimlari bilan mavjud bo‘lgan muammolar hamda ehtiyojlar haqida suhbatlashdi.
