Oilaviy bolalar uylari farzandlari kitob taqdimotida ishtirok etishdi
Farg‘ona shahridagi "Ahmad Farg‘oniy" nomidagi viloyat axborot-kutubxona markazida O‘zbekiston Yozuvchilar uyushmasi Farg‘ona viloyat bo‘limi homiyligida nashr etilgan «Farg‘ona oydinlari» kitobi taqdimotida shoir-u yozuvchilar, kitobsevarlar va jurnalistlar ishtirok etdi. To‘plamdan Yozuvchilar uyushmasining 42 nafar aʼzosi – zamondoshlarimizning sheʼr va nasriy asarlari, ilmiy maqolalari o‘rin olgan. Ijodiy kechaga Farg‘onadagi oilaviy bolalar uylari farzandlari ham taklif etildi.
Ijodkor ziyolilarning maʼruzalarini tinglash, yosh avlod tarbiyasi, insonda ijobiy fazilatlarni shakllantirishda adabiyotning o‘rni, shuningdek, mamlakatimizda zamonaviy adabiyotning rivojlanish tendensiyalari haqidagi suhbatlar bolalar uchun foydali bo‘ldi. Shuningdek, shoir va yozuvchilar o‘z asarlaridan parchalar o‘qidilar.
Kecha so‘ngida oilaviy bolalar uylari farzandlariga kitoblar to‘plami sovg‘a qilindi.
