Oilaviy bolalar uylari Milliy gvardiya eʼtibor markazida
Avval xabar berganimizdek, oliy taʼlim muassasalariga o‘qishga kirib mustaqil hayotga qadam qo‘ygan oilaviy bolalar uyi farzandlari va sobiq tarbiyalanuvchilar o‘qib, istiqomat qilayotgan talabalar turar joylarida yaratilgan sharoitlarni o‘rganish maqsadida Milliy gvardiya Markaziy devoni masʼullari joylarga chiqib o‘rganish ishlarini olib bormoqdalar.
Mazkur jarayonlar mobaynida, Muhabbat Xoliqovaning farzandlari tort pishirishdi. Shu tariqa qizaloqlar o‘zining pazandalik mahoratini ko‘rsatish hamda Milliy gvardiyaning g‘amxo‘rligi, mehribonligi uchun minnatdorchilik bildirish istagini ro‘yobga chiqarishdi.
Ushbu xonadon muhiti o‘zgacha iliq munosabat va samimiy mehrga bezangan. Xoliqova Muhabbatning oila aʼzolariga aylangan qizaloqlar va Sardorning taʼkidlashicha barchasi onasining eʼtiboridan boshlangan. Muhabbat Shodiyevnani bolalar Termiz shahar 12- son Mehribonlik uyidanoq ona deb chaqirishni boshlashgan, u yerda Muhabbat Shodiyevna tarbiyachi bo‘lib ishlagan. Shu sabab tashkil qilingan oilaviy bolalar uyiga moslashish bolalarda oson kechdi. Bolalar tarbiyasi va ularga bergan mehri uchun M. Xoliqova ko‘krak nishoni va faxriy yorliq bilan taqdirlandi. “Bolalarim mening omadim”, - deya 4 nafar farzandning onasi, bolalarining tartib – intizomi va o‘z ustida ishlashidan faxrlanishini taʼkidladi.
Ota-onalarning bola tarbiyasiga chin dildan yondashishi o‘z samarasini berganini Samarqandlik Sevinch misolida ko‘rishimiz mumkin. Usmonovlar oilasida tashkil qilingan oilaviy bolalar uyida Sevinchdan tashqari yana 6 nafar qizaloqlar tarbiyalanishadi. Iroda Baxramovna va Jamoliddin Kamolitdinovich, boshqa oilalar kabi ko‘p farzand va katta oilani orzu qilishgan. Lekin taqdir taqozosi bilan ular birgina o‘g‘il farzand ko‘rishgan. Shu sababdan 1-son Mehribonlik uyida ishlovchi Iroda Baxramovna turmush o‘rtog‘iga bola asrab olish taklifini berganda turmush o‘rtog‘i ham uni qo‘llab quvvatlagan.
Bu yil Usmonovlar oilasida katta bayram nishonlandi: ularning to‘ng‘ich qizi Sevinch Samarqand Davlat tibbiyot universitetiga talabalikka qabul qilindi.
Milliy gvardiya Markaziy devon vakillari ham Sevinchni tabriklab, aʼlo baholarga o‘qishini tilashdi. Bundan tashqari ishchi guruh endilikda Sevinch yashaydigan talabalar turar joyida barcha yashash sharoitlari mavjudligiga ishonch hosil qilish uchun ko‘zdan kechirishdi. Shuningdek taʼlim muassasasi rahbarlari bilan o‘zaro aloqada bo‘lish uchun kelishib olindi.
