Oilaviy bolalar uyi farzandlari kamondan otish sportida o‘z mahoratlarini sinovdan o‘tkazdi
O‘tmishda ota-bobolarimiz juda qadimgi davlatchilik anʼanalariga ega bo‘lgan boy maʼnaviyat va moddiy yodgorliklarni meros qoldirishgan. Ular chavandozlik, merganlik va yakka kurashning usullarini yaxshi egallagan edilar.
Bugungi kunda asrlar davomida mardlik, bag‘rikenglik, oliyjanoblik va halollikning timsoli sifatida eʼzozlanib kelingan, o‘zbek xalqining tarixiy merosi – “Kamondan otish” sport turini qayta tiklashga alohida eʼtibor qaratilmoqda.
Shu maʼnoda, bugungi kunda Milliy gvardiya bo‘linmalari tomonidan mamlakatimizda kamondan otish sport turini yana-da rivojlantirish, aholining barcha qatlamlari, ayniqsa yoshlarni “Kamondan otish” sport turi bilan muntazam shug‘ullanishiga keng shart-sharoitlar yaratilmoqda.
Bugun ham, ana shunday tadbirlarning biri Buxoro shahridagi 19-IDUM sport o‘yingohida bo‘lib o‘tdi.
Milliy gvardiya Buxoro viloyati bo‘yicha boshqarmasi, Qo‘riqlash boshqarmasi hamda Harbiy prokuratura hamkorligida tashkil etilgan tadbirda 50 ga yaqin Oilaviy bolalar uyi farzandlari merganlikda o‘z mahoratlarini sinovdan o‘tkazdilar.
Musobaqa yakunida g‘oliblar diplom hamda esdalik sovg‘alariga ega bo‘ldilar. Bu esa o‘z-o‘zidan qiziquvchilarning kamondan otish sport turiga jalb etilishiga imkon yaratadi.
