Oilaviy bolalar uylari farzandlari va ularning ota-onalarini bayram bilan tabriklashdi
Milliy gvardiya Farg‘ona viloyati bo‘yicha boshqarmasi harbiy xizmatchi va xodimlari boshqarma boshlig‘i Sh. Akbarov boshchiligida viloyatda tashkil etilgan oilaviy bolalar uylariga tashrif buyurib, bolalar va ularning ota-onalarini muqaddas ayyom bilan tabriklashdi.
Shunday qilib, gvardiyachilar Farg‘ona tumanida yashovchi Valiyevlar hamda Farg‘ona shahrida istiqomat qiluvchi Raxmonovlarning xonadonlarida bo‘lishdi.
Bolalar mehmonlar tashrifi va ular bilan muloqotga kirishishdan xursand bo‘lishdi. Oila farzandlari mehmonlarga yozgi taʼtilni qanday o‘tkazayotganlari haqida gapirib berishdi. Valiyevlar oilasi farzandlari bo‘lsa chet tilini o‘rganish bo‘yicha qo‘lga kiritgan yutuqlari haqida zavq bilan so‘zlab berdilar. Qizlar chet tilini bilash ularga yana bir ishda – tikish va bichish, kiyim dizayni sirlarini o‘rganish uchun ham qo‘l kelayotganini taʼkidlab o‘tishdi.
Chet tilini o‘zlashtirganliklari haqida Raxmonovlar oilasi farzandlari ham g‘urur bilan ayta oladilar. Rasm chizish sirlarini rassomlik to‘garaklarida o‘rgangan bo‘lsalar, chiroyli raqsga tushish sirlarini esa yana bir qiziqarli mashg‘ulot, raqs to‘garaklarida o‘rganganlar. Yigitlar esa futbol to‘garaklarida nimalarni o‘rganganliklarini namoyish qildi.
Suhbat davomida bolalar gvardiyachilardan harbiylik kasbida sportning o‘rni va qanday qilib vatan himoyachisi bo‘lish mumkinligiga qiziqishdi.
