Oilaviy bolalar uylari yoshlarining qishki taʼtili maroqli o‘tmoqda
Surxondaryo viloyati o‘zining madaniyati, qadriyati, boy tarixiy merosi va muqaddas qadomjolari bilan ko‘plab turistlarni o‘ziga rom etib kelmoqda. Albatta, viloyatda tashqi va ichki turizmni rivojlantirishga, hududga tashrif buyuruvchilar uchun qulay shart-sharoitlarni yaratishga alohida eʼtibor qaratilyapti. Yoshlarning qishki taʼtil mavsumini maroqli tashkil etish, vohadagi mavjud tarixiy obidalar bilan yaqindan tanishishtirish maqsadida, O‘zbekiston Respublikasi Milliy gvardiyasi Surxondaryo viloyati bo‘yicha boshqarmasi tashabbusi bilan, "Oilaviy bolalar uyi" o‘g‘il-qizlari uchun navbatdagi sayohat uyushtirildi. Dastlab yoshlar Sherobod tumanida joylashgan Abu Iso Muhammad at-Termiziy majmuasini ziyorat qildilar. Bu yerda yaratilgan shart-sharoitlar, milliy meʼmorchilik anʼanalarini o‘zida mujassam etgan masjid hamda zamonaviy kutubxona ularga katta taassurot qoldirdi. Bizgacha boy va maʼnaviy meʼros qoldirgan allomaning hayoti va ijodi haqida o‘g‘il-qizlarga batafsil maʼlumotlar berildi.
Shundan so‘ng, Termiz shahrida joylashgan Al Hakim at Termiziy maqbarisiga tashrif buyurildi. Mutaxassislar bolajonlarga buyuk ajdodimiz Al Hakim at Termiziyning hayot yo‘li haqida hikoya qilib, uning muhaddis, hofiz, imom va olim bo‘lganligini, 400 dan ortiq qimmatli asarlar yozib qoldirganligini aytib o‘tdilar. Kun davomida tashkil etilgan sayohat ularga katta taassurot qoldirdi.
