Oilaviy bolalar uylari farzandlari doim Milliy gvardiya xodimlari eʼtiborida
Milliy gvardiya Surxondaryo viloyati boʻyicha boshqarmasi harbiy xizmatchilari va xodimlari oilaviy bolalar uylari farzandlari, homiylik va vasiylik ostida katta boʻlayotgan bolalarni eʼtibordan chetda qoldirmaydi. Kuni kecha Milliy gvardiya xodimlari M. Xoliqov oilaviy bolalar uyi farzandlari xolidan xabar oldilar.
Ushbu oilada oʻtkazilgan vaqt davomida bolalar taʼtil qanday oʻtayotganligini, butun oila bilan qayerlarga sayohatga borishganlari, maktabga nima sotib olishni rejalashtirganliklari, toʻgaraklarda nimani oʻrganganlari va sportdagi muvaffaqiyatlari, yangi doʻstlari, sevimli kitoblari va oʻzlari qiziqib koʻrgan filmlari haqida ham gapirib berishdi. Shuningdek, ular harbiy xizmatchilardan bolaligi va sevimli mashgʻulotlari, maktabda qanday oʻqiganliklari, taʼtil kunlari nimalar bilan shugʻullanishlari haqida soʻrashdi. Shundan keyin hamma birgalikda- kattalar va bolalar maktab va yoz, Vatan va doʻstlik haqidagi sheʼrlarni esladilar.
Harbiy xizmatchilar va xodimlar ota-onalar bilan ham suhbatlashdilar, bolalarning turmush sharoitini oʻrgandi, maktabga tayyorgarlik qanday ketayotgani, bolalarga nimalar zarurligini ham soʻrashdi.
Xayrlashish chogʻida bolalar mehmonlarga sogʻliq, baxt va tinchlik tilab, tez-tez tashrif buyurishlarini aytib qolishdi.
