Qoraqalpog‘istonda Mehribonlik uyining uch nafar sobiq bitiruvchilariga xonadon kalitlari topshirildi.
Maʼlumot uсhun: Utemuratov Qo‘shqarbay 29 yoshda, Aytuganov Janibek bu yil 26 yoshga to‘ladi, Alpisbayeva Ziyuar boʻlsa 25 yoshda. Ular 1-sonli Mehribonlik uyining sobiq bitiruvchilari. Qo‘shqarbay 2010-yilda 18 yoshga toʻlganidan soʻng ta’lim muassasasini tark etgan, oradan ikki yil o‘tib Janibek va Ziyuar ham mazkur Mehribonlik uyini tamomlagan.
Sobiq bitiruvchilar bir shaharda – Nukusda istiqomat qilishsada, koʻrishib turishga hech imkoni boʻlmas edi. Har zamonda uchrashib qolishsa, birinchi navbatda bir-birlariga bir savol berishardi: xonadon bilan taʼminlanish haqida yangilik bormi?
Ularning har biri Mehribonlik uyi bitiruvchisi sifatida uy-joy olish huquqiga ega edi. Shu kunga qadar ular imkon qadar turli, og`ir sharoitlarda yashab kelgan. Asosan, arzonroq, shart-sharoiti boʻlmagan xonadonlarni ijaraga olishgan.
Milliy gvardiya hamda mahalliy hokimlik vakillari tomonidan Qo‘shqarbay, Janibek va Ziyuarlarning yashash sharoiti oʻrganilib, 30 yoshgacha bo‘lgan, uy-joy bilan ta’minlanmagan, sobiq bitiruvchilar roʻyxatiga kiritildi.
Hamkorlikdagi ishlar samarasida kuni kecha uch qahramonimiz oʻz xonadoniga ega boʻldi. Milliy gvardiya, hokimiyat hamda keng jamoatchilik vakillari ishtirokida barcha qulayliklarga ega, shinam, uy jihozlari hamda maishiy texnika bilan jihozlangan xonadon kalitlari topshirildi.
