Oromgohda yoz: Milliy gvardiya ishtirokidagi harbiy-vatanparvarlik tadbirlari davom etmoqda
Milliy gvardiya Namangan viloyati bo‘yicha boshqarmasi harbiy xizmatchilari va qo‘riqlash xizmati xodimlari tomonidan maktab o‘quvchilarining “Zarkent” bolalar sog‘lomlashtirish oromgohida yozgi ta’tillarini maroqli o‘tkazishlarini ta’minlash maqsadida qiziqarli ko‘ngilochar tadbirlar tashkil etildi.
Shuni ta’kidlashimiz kerakki, Yangiqo‘rg‘on tumanidagi so‘lim go‘shalarda joylashgan oromgoh bolalarning tabiat qo‘ynida hordiq chiqarib, musaffo havodan nafas olib, salomatligini mustahkamlashi bilan ajralib turadi. Tashkillashtirilayotgan turli sport, madaniy-ma’rifiy, ko‘ngilochar tadbirlar esa yangi bilim va ko‘nikmalarga ega bo‘lish, jismoniy, aqliy va ma’naviy kamol topishga xizmat qiladi.
Shunday qilib, o‘tkazilayotgan tadbirlar bolalarda harbiylikka bo‘lgan qiziqishi va vatanparvarlik tuyg‘ularini uyg‘otib, Vatanga muhabbat ruhida ulg‘ayishiga turtki bo‘lmoqda.
Harbiy texnika va qurol-aslahalar ko‘rgazmasi o‘g‘il-qizlarda katta qiziqish uyg‘otdi. Harbiy xizmatchilarning Vatanga xizmat qilishdek sharafli yo‘lni tanlagan yoshlar haqidagi hikoyalari tadbirga o‘zgacha shukuh bag‘ishladi.
Shuningdek, bolalar uchun kamondan otish bo‘yicha mahorat saboqlari hamda shaxmat, tennis, futbol bo‘yicha musobaqalar o‘tkazildi. Tanlov g‘oliblari faxriy yorliqlar bilan taqdirlandi.
