Bayramga tuhfa
Bundan ikki yil avval Farg‘ona viloyatining Qo‘shtepa tumanida istiqomat qiluvchi Sohibaxon va Ilxomjon Aminovlar oilasi taqdir taqozosi bilan ota-ona mehridan mosuvo bo‘lgan besh nafar qizaloqni o‘z qaramog‘iga olgan edilar. Ushbu juft qizaloqlar ularning xonadonida mehr va muhabbat ko‘rishlari, taskin topishlari uchun barcha zarur shart-sharoitlarni yaratib berishdi. Yangi oila aʼzolarini eʼtibor bilan qurshab, ular yangi muhitda o‘zlarini qanday his qilishayotgani bilan chin dildan qiziqdilar. Birgalikda qizaloqlarga berilgan uy vazifalarini bajarib, oila davrasida bo‘sh vaqtlarini kitob o‘qish, foydali ko‘rsatuvlar, filmlarni tomosha qilish bilan o‘tkazdilar. Kuni kecha esa ushbu baxtiyor oila o‘z hayotlaridagi yana bir muhim va quvonchli voqeani nishonladilar: O‘zbekiston Respublikasi Oila va xotin-qizlar qo‘mitasi tomonidan Sohibaxon Aminova yuqori darajadagi mukofot - «Moʻtabar ayol» ko‘krak nishoniga loyiq topildi.Xalqaro xotin-qizlar kuni munosabati bilan bo‘lib o‘tgan tadbirda Farg‘ona viloyati hokimi Xayrullo Bozorov ishtirok etib, qahramonimizga ko‘krak nishonini tantanali topshirdi. Sohibaxon Aminovani mukofot bilan tabriklaymiz, oila aʼzolariga sihat-salomatlik tilab qolamiz!
