Poytaxtimizdagi 21-sonli Mehribonlik uyining besh nafar tarbiyalanuvchisi o‘z oilasiga ega bo‘ldi.
Shu munosabat bilan bugun Olmazor tumanida istiqomat qiluvchi Yusupovlar oilasida katta tantana. Mazkur tadbirga baxtiyor ota-ona va besh nafar o‘g‘ilni tabriklash uchun O‘zbekiston Milliy gvardiyasi qo‘mondonligi vakillari, tuman hokimi Azizxon Umarxonov, xalq deputatlari tuman Kengashi deputati To‘rabek Nazarovlar tashrif buyurdi. 21-sonli Mehribonlik uyining rahbari Yahshigul Shodiyeva bolajonlarga baxt - saodat tilab, ota-onalariga itoat etishini, opa-singillariga madad bo‘lishini hamda doimo ilm olishga intilish kerakligini taʼkidladi.
– Bugun xalqaro bolalarni himoya qilish kunida biz bu yerga, aytish mumkinki, katta oila yaratilganligi bois yig‘ilib turibmiz,buning zamirida albatta ramziy maʼno bor - dedi tuman hokimligi rahbari o‘zining qutlov nutqida.
Anvar Lazizovich va Saodat Abdurasulovna nikohlarining dastlabki kunlaridanoq farzandlari ko‘p bo‘lishini orzu qilishgan.
Yusupovlar oilasining 9 xonali katta uyida 13 yoshli Amir va Dmitriy, 12 yoshli Danil, 15 yoshli Aleksandr va 8 yoshli Pavel uchun alohida xonalar ajratilgan bo‘lib, bunday sharoitlardan bolajonlar juda ham mamnun.
Shuni alohida taʼkidlash joizki, bo‘lg‘usi Yurt himoyachilari o‘z oilasiga, opa -singil hamda aka-ukalariga ega. Endi ular har doim mushkul vaziyatlarda kimga murojaat qilishlarini va kim bilan quvonchli lahzalarini baham ko‘rishlarini bilishadi va bu oila-abadiydir!
