O‘zbekiston Respublikasi Oliy Majlisi Senati Fan, taʼlim va sog‘liqni saqlash masalalari qo‘mitasi vakillari Buxoro viloyatidagi Oilaviy bolalar uylariga tashrif buyurishdi.
Jumladan, qo‘mita raisi va Milliy gvardiya Buxoro viloyati bo‘yicha boshqarmasi masʼul xodimlari Buxoro shahrida joylashgan 2-6 va 9 sonli Oilaviy bolalar uylarida bo‘lishdi.
Mattiyevlar oilasida olti nafar o‘g‘il bola farzand, Asatullayevlar oilasida yetti nafar bola, Jo‘rayevlar oilasida esa besh nafar bolajonlar bor. Bolalar ushbu oilalarda muhabbat va g‘amxo‘rlik qurshovida, atrof-muhit bilan ijobiy munosabatlarni yo‘lga qo‘yishni o‘rganishga harakat qilgan holda ulg‘aymoqdalar. Bolajonlar kun sayin avval o‘zlariga notanish bo‘lgan ota-ona va qarindoshlar muhabbati tuyg‘usini anglamoqdalar, shuningdek, oilada ular doim himoya, motivatsiya va samimiy mehrni topish mumkin ekanligiga o‘rganmoqdalar.
Mehmonlar birinchi navbatda bolalar ushbu oilalarda qanday sharoitlarda yashayotganiga qiziqishdi. Ovqatlanish ratsioni qanday, o‘qishdan bo‘sh vaqtlar nimalar bilan shug‘ullanadilar, ularga ajratilgan xonalar qanday jihozlangan, umuman olganda ular katta bo‘lsa qaysi kasb egasi bo‘lishni istagida ekanliklarini so‘radilar. Kimdir qo‘li yengil vrach bo‘laman desa, yana kimdir insonlar haq-huquqlarini himoya qilish va har qanday vaziyatda ham adolat tantana qilishga erishishni istashini aytsa, javoblar ichida eng taʼsirlisi katta bo‘lgach huddi o‘zi yashayotgan oila singari Oilaviy bolalar uyi tashkil etib, mehribon ota-ona bo‘lish, hozirda bu bolajonga berilayotgan imkoniyatlarni kelgusida o‘ziga o‘xshagan, oila taftini tuyishni istovchi bolalarga taqdim etish niyatida ekanligini aytgan bolaning javobi bo‘ldi.
Bir so‘z bilan aytganda, yoshlar bilan uchrashuv samimiy suhbat shaklida bo‘lib o‘tdi. Uchrashuv so‘ngida bolajonlarga ularning kitob javonlaridan alohida o‘rin oluvchi asarlar taqdim etildi.
