Ўзбекистон Республикаси Олий Мажлиси Сенати Фан, таълим ва соғлиқни сақлаш масалалари қўмитаси вакиллари Бухоро вилоятидаги Оилавий болалар уйларига ташриф буюришди.
Жумладан, қўмита раиси ва Миллий гвардия Бухоро вилояти бўйича бошқармаси масъул ходимлари Бухоро шаҳрида жойлашган 2-6 ва 9 сонли Оилавий болалар уйларида бўлишди.
Маттиевлар оиласида олти нафар ўғил бола фарзанд, Асатуллаевлар оиласида етти нафар бола, Жўраевлар оиласида эса беш нафар болажонлар бор. Болалар ушбу оилаларда муҳаббат ва ғамхўрлик қуршовида, атроф-муҳит билан ижобий муносабатларни йўлга қўйишни ўрганишга ҳаракат қилган ҳолда улғаймоқдалар. Болажонлар кун сайин аввал ўзларига нотаниш бўлган ота-она ва қариндошлар муҳаббати туйғусини англамоқдалар, шунингдек, оилада улар доим ҳимоя, мотивация ва самимий меҳрни топиш мумкин эканлигига ўрганмоқдалар.
Меҳмонлар биринчи навбатда болалар ушбу оилаларда қандай шароитларда яшаётганига қизиқишди. Овқатланиш рациони қандай, ўқишдан бўш вақтлар нималар билан шуғулланадилар, уларга ажратилган хоналар қандай жиҳозланган, умуман олганда улар катта бўлса қайси касб эгаси бўлишни истагида эканликларини сўрадилар. Кимдир қўли енгил врач бўламан деса, яна кимдир инсонлар ҳақ-ҳуқуқларини ҳимоя қилиш ва ҳар қандай вазиятда ҳам адолат тантана қилишга эришишни исташини айтса, жавоблар ичида энг таъсирлиси катта бўлгач ҳудди ўзи яшаётган оила сингари Оилавий болалар уйи ташкил этиб, меҳрибон ота-она бўлиш, ҳозирда бу болажонга берилаётган имкониятларни келгусида ўзига ўхшаган, оила тафтини туйишни истовчи болаларга тақдим этиш ниятида эканлигини айтган боланинг жавоби бўлди.
Бир сўз билан айтганда, ёшлар билан учрашув самимий суҳбат шаклида бўлиб ўтди. Учрашув сўнгида болажонларга уларнинг китоб жавонларидан алоҳида ўрин олувчи асарлар тақдим этилди.
