Yetim bolalar va ota-ona qaramog‘isiz qolgan bolalarni har tomonlama qo‘llab-quvvatlash bo‘yicha ishlar davom etmoqda
Farg‘ona viloyatida yetim bolalar va ota-ona mehr-muxabbatidan mosuvo qolgan bolalarni ijtimoiy qo‘llab-quvvatlash, jumladan, uy-joy bilan taʼminlash ishlari davom etmoqda. Kuni kecha taʼlim-tarbiya maskanlarining sobiq yetti nafar tarbiyalanuvchi o‘g‘il-qizlarga xonadon kalitlari topshirildi.
Yoshlar xonadon kalitlarini Farg‘ona shahri hokimi X. Bozorov qo‘lidan qabul qilib oldilar. Hokim xonadon kalitlarini yoshlarga topshirar ekan viloyat hokimligi yoshlarning mustaqil hayotning ilk qadamlaridan qo‘llab-quvvatlashga tayyor ekanini aytib, o‘g‘il-qizlar hayotidagi ushbu muhim voqea bilan muborakbod etdi va kelgusida o‘qish va ishlarida omadlar yor bo‘lishini tilab qoldi.
Ushbu tadbirda Milliy gvardiyaning Farg‘ona viloyati bo‘ycha boshqarmasi boshlig‘i Sh. Akbarov ham ishtrok etib taʼlim-tarbiya maskani qaldirg‘ochlariga o‘z ezgu tilaklarini bildirdi hamda esdalik sovg‘alarini topshirdi.
Yoshlarning quvonchi bir olam, chunki ular barcha qulayliklarga ega o‘z xonadonlarida mustaqil hayotga qadam qo‘ymoqdalar.
- Davlatimiz meni mehr va eʼtibordan chetda qoldirmaganidan bag‘oyat xursandman, ona yurtim rivoji uchun yashash va mehnat qilishga vaʼda beraman, - dedi Alimardon Abdujalilov.
