Ilmning sehrli olamiga sayohat
Qashqadaryo viloyati Qamashi tumanidagi oilaviy bolalar uylari farzandlari tuman kutubxonasiga sayohatni shunday taʼriflashdi. Darhaqiqat, kitoblar inson uchun ajoyib dunyolar, tarix, madaniyat va bilimlar eshiklarini ochib beradi. Bolalar bilimga moyil bo‘lganligi sababli, ularda yangiliklarni tushunish, boshqa mamlakatlar va boshqa odamlarni kashf qilish istagi bor, kutubxonaga sayohat ular uchun bilim olamiga haqiqiy sayohatga aylandi.
Sayohat bolalarda katta taassurot qoldirdi. Dastlab kutubxona xodimlari kutubxonalar haqidagi ilk maʼlumotlar bizga qadim zamonlardan kelganligi haqida so‘zlab berdilar. Baʼzi maʼlumotlarga ko‘ra, birinchi kutubxona Janubi-G‘arbiy Osiyoda, Mesopotamiyadan Misrgacha bo‘lgan hududda paydo bo‘lgan. Shuningdek, eng qadimgi kutubxona Xitoyda aniqlangan. Garchi eng birinchi kutubxonani Shumer davridagi qadimiy loy lavhalar ombori deb atash mumkin. Bolalarning o‘zlari turgan kutubxona haqida, umuman mamlakatimiz kutubxonalari haqidagi qiziqarli maʼlumotlarni tinglash maroqli bo‘ldi. Yosh tashrif buyuruvchilar tarixiy anʼanalar, milliy qadriyatlarimizni o‘zida mujassam etgan liboslar bilan ham tanishishdi. Jahon va milliy adabiyotning xilma-xil olamiga sho‘ng‘idilar. Kitob olamiga sayohat barcha o‘g‘il-qizlarda unutilmas taassurot qoldirdi.
