Bugungi kunda Oilaviy bolalar uyi farzandlarining quvonchlari cheksiz, ota-onalar boʻlsa, bolalari bilan faxrlanmoqda.
Farzand, uning tarbiyasi har doim ota-onalar uchun masʼuliyatli vazifalardan biri sanalgan. Sirdaryo viloyatida Oilaviy bolalar uyini tashkil etgan Aziz aka ham bugungi kunda oila aʼzolarining bir-biriga boʻlgan mehri, farzandlarining qiziqishlari hamda yutuqlarini faxr bilan tilga olishdan charchamaydi. Aynan, uning Milliy gvardiya qoʻmondonligi tomonidan ragʻbatlantirilishida ham ayni jihatlar oʻrin tutadi. Milliy gvardiya Xotin-qizlar jamoatchilik Kengashi aʼzolari ham aynan Sirdaryo viloyatida tashkil etilgan 4-sonli “Bolajonlar-xonadon quvonchi” nomli Oilaviy bolalar uyi faoliyati va yaratilgan shart-sharoitlar bilan tanishdi hamda bolalar bilan davra suhbati oʻtkazdi.
Suhbat davomida vakillar bolajonlar bilan doʻstona aloqa oʻrnatib, ularning qiziqishlari, bilim darajasi, yozgi rejalari hamda maqsadlari bilan tanishdi. Bolajonlar ham oʻz navbatida, toʻgarakda oʻrgangan mashgʻulotlari asosida chizgan rassomchilik asarlari hamda qoʻl mehnati namunalarini faxr bilan koʻrsatishdi.
Shundan soʻng, Oilaviy bolalar uyi tarbiyalanuvchilarini kelajakda komil inson boʻlib voyaga yetishi yoʻlida amalga oshirayotgan salmoqli xizmatlari hamda Oʻzbekiston Respublikasi Milliy gvardiyasi bilan samarali hamkorligi uchun Azizbek Gadoyevga Oʻzbekiston Respublikasi Milliy gvardiyasi qo`mondoni hamda Maktabgacha va maktab ta'limi vazirining tabrigi o`qib eshittirilib, esdalik qoʻl soati tantanali topshirildi.
