"RANGLAR JILOSIDA – ONA DIYOR" RASMLAR KO‘RIK–TANLOVI BO‘LIB O‘TDI
Mamlakatimiz mustaqilligining o‘ttiz bir yillik shodiyonasi arafasida "Ranglar jilosida – ona diyor" rasmlar ko‘rik – tanlovi tashkil etildi.
Eʼtirof etish joizki, mazkur tadbir O‘zbekiston Respublikasi Prezidentining Yoshlar maʼnaviyatini yuksaltirish, ularning bo‘sh vaqtini mazmunli tashkil etish bo‘yicha birinchi tashabbusini amalga oshirishda ham muhim ahamiyat kasb etadi.
Tadbirni o‘tkazishdan maqsad, yosh isteʼdodlarning sanʼat va madaniyatga bo‘lgan qiziqishlarini yana-da oshirish, iqtidorli yoshlarni aniqlash, ularni tasviriy sanʼatga va badiiy ijodga bo‘lgan qiziqish va eʼtiborini mustahkamlashdan iborat.
Tadbirda, Milliy gvardiya Buxoro viloyati bo‘yicha boshqarmasi, Qo‘riqlash boshqarmasi harbiy xizmatchi, xodimlari hamda ularning farzandlari, Oilaviy bolalar uyining isteʼdodli yoshlari ishtirok etdilar.
Ishtirokchilar qalbida mazkur tadbirning ahamiyati juda katta bo‘ldi, negaki bu rassomchilikka ozgina bo‘lsa-da, iqtidori va isteʼdodi bo‘lgan yoshlarning mehnatini yuzaga chiqarishga ko‘mak beradigan tadbir bo‘lganligi, shubhasiz.
Shu bilan birga, yosh havaskor musavvirlar tomonidan chizilgan suratlarga diqqat bilan tikilar ekansiz, mavzularning rang-barangligi kishi diqqatini tortadi.
Ochiq osmon ostida, Buxoro shahridagi so‘lim maskanlardan biri "Ko‘hna va boqiy Buxoro monumenti"da tashkil etilgan musobaqa yakunida, masʼullar tomonidan g‘olib deb topilgan ishtirokchilar diplom va esdalik sovg‘alari bilan taqdirlandilar.
