Milliy gvardiya maʼnaviyat va maʼrifat markazida bo‘lib o‘tgan mazkur tadbirda Milliy gvardiya qo‘mondoni o‘rinbosari polkovnik S.Mamayusupov, Maktabgacha va maktab taʼlimi vaziri o‘rinbosari T. Komilov, O‘zbekiston Respublikasi Yoshlar siyosati va sport vazirining o‘rinbosari Sh.Maxmudov, O‘zbekiston Respublikasi Futbol assotsiatsiyasi 1-vitse prezidenti R.Irmatov, Milliy Olimpiya qo‘mitasi bosh kotibi O.Qosimov, murabbiy va yosh sportchilar hamda 22-sonli Mehribonlik uyi tarbiyachi va tarbiyalanuvchilari ishtirok etishdi.

Tadbir qo‘mondon o‘rinbosari S.Mamayusupov tomonidan kirish so‘zi bilan ochib berilgandan so‘ng “Rossiya Federatsiyasining Sankt-Peterburg shahrida bo‘lib o‘tgan V-Xalqaro forum doirasida sportning Mini-futbol turi bo‘yicha musobaqa g‘oliblarini taqdirlash to‘g‘risida”gi Milliy gvardiya qo‘mondoni buyrug‘i o‘qib eshittirilib, unga ko‘ra yosh qahramonlarimiz va ularning murabbiylariga qimmatbaho sovg‘alar topshirildi.

Tabrik uchun so‘z olgan mehmonlar, yosh futbolchilarimiz ushbu Xalqaro musobaqada g‘oliblikni qo‘lga kiritib, o‘n ikki yoshidayoq yuqori arenalarda mamlakatimiz madhiyasini yangrashiga hissa qo‘shganliklarini haqiqiy qahramonlik deya eʼtirof etishdi.

Sport vazirligi va Futbol assotsiatsiyasi mutasaddi rahbarlari ushbu yosh avlod O‘zbekiston futbol terma jamoasining bo‘lg‘usi nomzodlari ekanligini taʼkidlashdi.

Ishonamizki, yosh sportchilarimiz yaratilayotgan imkoniyatlardan samarali foydalanib, erishgan yutuqlari bilan cheklanib qolmasdan, bu boradagi shonli anʼanalarimizni munosib davom ettirishadi hamda jahon sport arenalarida Yangi O‘zbekiston bayrog‘ini yana-da baland ko‘tarishadi.