Haqiqiy baxt - bu farzandingizning orzusi amalga oshganidir.
"Mehribon qalb" va "Murg‘ak qalb" nomli Oilaviy bolalar uylariga Furqat tumani hokimi Jahongir Jumanov, Farg‘ona viloyati Milliy gvardiya boshqarmasi vakillari va tuman Ichki ishlar bo‘limi boshlig‘i To‘rabek Egamberdiyevlar tashrif buyurdi. Mehmonlar bolalarning yashash sharoitlarini ko‘zdan kechirib, ota-onalar va bolalar bilan maktabdagi o‘qish jarayonlari, mahalladagi yangi do‘stlari, ish va dam olish kunlari qanday o‘tayotgani haqida suhbatlashdilar.
Bu kabi suhbatlarning nomigagina o‘tkazilmayotganligi "Mehribon qalb" nomli Oilaviy bolalar uyining farzandiga taqdim etilgan sovg‘adan ham maʼlum: Shahnozaxon Abdullayeva tikuv mashinasini orzu qilar edi. Bugun uning yana bir orzusi ushaldi. Bundan tashqari, Milliy gvardiya vakillarining yordami tufayli endilikda Shahnoza tuman bandlikka ko‘maklashish markazida tashkil etilgan kasb-hunar kurslarida tikuvchilik bo‘yicha taʼlim oladi.
– Buvim bizga tez-tez kasb-hunarli inson hech qachon xor bo‘lmasligini aytardilar. Shuning uchun men tikuvchi va dizaynerlik kasbini tanladim. Men doim tikuv mashinasiga ega bo‘lishni, shuningdek, haqiqiy tikuvchilardan mahorat saboqlarini olishni xohlardim. Orzuimni amalga oshirishda yaqindan yordam bergan barchaga o‘z minnatdorchiligimni bildiraman!
"Baxt-bu farzandingizning orzusi amalga oshganidir", dedi Shahnozaning onasi Hurriyat Komilova.
