Mehribonlik uyining sobiq tarbiyalanuvchisiga yangi xonadon kalitlari topshirildi
Shu kunlarda Dayanch Ergashev va uning turmush o‘rtog‘i Nargizaning hayotida esda qolarli voqea sodir bo‘ldi: ularga Bog‘dod tumanidan yangi xonadon kalitlari topshirildi.
28-yoshli Dayanch Farg‘ona viloyati 1-sonli “Mehribonlik” uyida tarbiyalanib, 2012 yilda mustaqil hayotga qadam qo‘ygan. Hozirda Qo‘qon davlat pedagogika universitetining psixologiya fakulteti 4 bosqichida tahsil oladi va o‘zi orzu qilganidek ichki ishlar organlarida xizmat qiladi. To‘g‘rirog‘i Farg‘ona viloyati IIB 2-mintaqaviy hududning safdor xodimi. Hozircha safdor lavozimida xizmat olib boradi, lekin maqsadiga tinmay intiluvchi qonun himoyachisining kelajak rejalari o‘ta ulkan. Ikki yil oldin Dayanch uylandi. Yosh oila ijarada yashashiga to‘g‘ri keldi. Oson bo‘lmadi, lekin u bir kuni barchasi hal bo‘lishiga ishondi. Ishonchi to‘g‘ri bo‘lib chiqdi. D. Ergashev “Mehr daftari” elektron platformasiga kiritilganidan ko‘p o‘tmay unga yangi qurilgan uylardan xonadon ajratildi.
Jihozlar va kerakli maishiy uskunalar bilan jihozlangan xonadon kalitlarini topshirish marosimida Milliy gvardiya va Ijtimoiy himoya milliy agentligi vakillari, do‘stlari va xizmatdoshlari ishtirok etishdi.
– Men nihoyatda baxtiyorman, Davlat rahbaridan, Milliy gvardiya va Ijtimoiy himoya milliy agentligidan eʼtibor, yordam, g‘amxo‘rlik va menga berilgan, o‘zim orzu qilganimdek shaxsiy xonadon uchun minnatdorman. Men Vatanimga va xalqimga foydali inson bo‘lishni, ichki ishlar organlarida ishlashni, insonlarni qonunbuzarlardan himoya qilishni orzu qilganman va hozir yana-da kuchliroq javobgarlik bilan xizmat qilishga o‘zimda kuchli g‘ayrat his qildim.
